Paulo Dibala ziyana düşüb. “Yuventus”un oyunçusunun Turindəki evi qarət olunub.
“La Gazzetta dello Sport”un yaydığı xəbərə görə, hadisə çərşənbə axşamından çərşənbəyə keçən gecə baş verib. Oğrular 27 yaşlı hücumçunun villasına birinci mərtəbədəki pəncərəni sındırmaqla daxil olublar. Mühafizəçi cinayətkarları görüb həyəcan siqnalını basıb, ancaq oğrular villadan bir sıra əşyaları götürərək qaça biliblər. Oğurlanan əşyaların dəyəri hələ ki, məlum deyil. Onların Dibalanın bahalı saat kolleksiyasını oğurladığı güman edilir. “Yuventus” çərşənbə günü Çempionlar Liqasında “Zenit”ə minimal hesabla qalib gəlib. Zədəsini yenicə sağaldan Dibala Sankt-Peterburqa aparılmayıb.
Yeri gəlmişkən, argentinalı futbolçu klubu ilə yeni müqavilə üzrə danışıqlarda razılığa gəlib. Paulo uzun müddət çəkən bu prosesin sonunda istəyinə çatıb. Belə ki, yerli mənbələr onun tezliklə rəsmiləşəcək anlaşmaya görə ilə 8,5 milyon avro maaş alacağını bildirir. Futbolçunun yeni sözləşməsində bonus kimi hər il 1,5 milyon avro irəli düşə biləcəyi də qeyd ediləcək. Anlaşmanın müddəti isə 2026-cı ilədək nəzərdə tutulub. Cənubi amerikalı İtaliya klubunda 2015-ci ildən çıxış edir.
