Bu gün premyer-liqanın 8-ci turunda "Sabah" doğma meydanda "Sumqayıtı" qəbul edib.
"Football-plus.az" saytının məlumatına görə, "kimyaçılar"ın baş məşqçisi Ayxan Abbasov oyundan sonra mətbuat konfransında bunları deyib:
"Baş hakim İnqilab Məmmədov "Sumqayıt"ın uduzması üçün hər şeyi etdi" - Ayxan Abbasov
"Oyun haqqında danışılası nəsə yoxdur Komanda bir həftə ərzində matça hazırlaşır, gecə-gündüz əziyyət çəkir. İlk dəqiqələrdə qırmızı vərəqə verilməsi, komandanın oyununu pozur. Epizoda baxdıq, Murad hakimə etirazını bildirə bilər. Amma başqa heç nə etmədi. Baş hakim İnqilab Məmmədov "Sumqayıt"ın uduzması üçün hər şeyi etdi. Yəqin indi sevinir. İnsanların haqqına belə girmək olmaz. Bəlkə də, Tellur Mütəllimov ikinci hissənin əvvəlində qol vursaydı, fərqli şeylər olardı. Məşqçilik çətin sənətdi. Hərdən adam bu peşəni seçdiyi üçün peşman olur. Düşünür ki, bacarmadım. Bu gün işimə nifrət etdim. Niyə hakimin səhvini deyə bilmirik? Nə üçün? Bəs, biz necə inkişaf edəcəyik? Referi gəlib desin ki, qərar tam düzgündü. İlk 10-15-ci dəqiqədə belə "qırmızı" vermirlər. Hakim oyuna nəzarət etməlidi. Onlar baxmırlar xarici matçlara? Belə hakimlər özlərinə başqa sənət tapsınlar. Reqlament hakimlər haqqında danışmağa icazə vermir. Amma Məmmədov 11-ci dəqiqədə oyunu bitirdi".
