7-ci turun görüşlərində hakimliklə bağlı ciddi problemlər yaşanmadı.

Referilər futbolçuları 24 dəfə cəzalandırdı. Bu vərəqələrdən 22-nin rəngi sarı, 2-si qırmızı oldu. Turun ən kobud komandası “Qarabağ”dı. Ağdamlıların 4 futbolçusu sarı vərəqə ilə cəzalandı. Həftənin ən intizamlı klubu isə “Sumqayıt” oldu. “Kimyaçılar”ın, sadəcə, 1 oyunçu “sarı”ya tuş gəldi. Reportyorlarımızın qeydlərinə keçid alaq.

Səbail – Keşlə, RAUF CABBAROV
“Dənizçilər”in baş məşqçisi Aftandil Hacıyev “Rauf Cabbarov oyunu istənilən səviyyədə idarə etmədi” deyərkən tam haqlıdı. Söhbət heç də nəticəyə təsir edən səhvdən getmir. Məsələn, 18-ci dəqiqədə “Keşlə”nin hücumu zamanı İlkin Qırtımov yerdə qalsa da, topa çatan Neto qapıçı ilə təkbətək çıxa bilərdi. Amma FİFA referisi “üstünlük” prinsipinə əməl etmədi. Onun ən böyük qüsuru isə az qala hər qərarını 2-3 dəqiqə ərzində futbolçulara anlatması idi. “Səbail”in qapısına ilk qolun vurulduğu epizodda referi düz 3 (!) dəqiqə ərzində cərimə zərbəsinin yerinə yetirilməsini təmin edə bilmədi. Halbuki buna mane olan futbolçular dərhal, özü də sərt şəkildə cəzalandırılmalıydı. Bir sözlə, bu səviyyədə oyun idarə edən adamın beynəlxalq oyunlara təyinat gözləməsi sadəlövhlük olardı.

Qəbələ - Zirə, ƏLİYAR AĞAYEV
Oyunu təcrübəsinə və adına layiq şəkildə idarə etdi. Təsadüfi deyil ki, 90 dəqiqə ərzində onun qərarlarından narazılıq edən olmadı. Heç məşqçilər də mətbuat konfransında hakimliklə bağlı şikayət dilə gətirmədilər. Köməkçiləriylə yaxşı anlaşan FİFA referisi itirilən zamanı nəzərə aldı və ilk yarıya 3 dəqiqə əlavə etdi. Onun ikinci hissəyə 5 dəqiqə əlavə etməsi də ədalətli idi. Ehtiram Şahverdiyevlə Dmitrios Çantakiasın davasına çevik müdaxilə edən Ağayevin göstərdiyi vərəqələr də haqlı sayılmalıdı.

Sabah - Qarabağ, KAMAL UMUDLU
Bunu turun ən gərgin keçən oyunu adlandıra bilərik. Kamal Umudlu qarşılaşmanın ağırlığına tab gətirsə də, bariz səhvlərə yol verdi. Bunlardan ilki 27-ci dəqiqədə yaşandı. “Sabah”ın hücumçusu Xulio Sezar Rodriges Şahruddin Məhəmmədəliyevi vurduğuna görə qırmızı vərəqə alaraq meydandan qovuldusa, qapıçıya “sarı” göstərildi. Lakin epizodun təkrarına baxdıqda görürük ki, Şahruddin hücumçunu özündən çıxmağa sövq edir. Daha bir səhv isə 90-cı dəqiqədə yaşandı. Andrade Fofanaya qarşı qaydanı pozdu. Kamal Umudlu oyunu davam etdirsə də, sonradan “Qarabağ”ın yarımmüdafiəçisinə sarı vərəqə göstərmədi. Bu qeyd etdiklərimizi nəzərə almasaq, hakim oyunu yaxşı idarə etdi.

Sumqayıt - Neftçi, ELÇİN MƏSİYEV
Status baxımından “Sumqayıt” - “Neftçi” matçı turun bəlkə də ən ağır qarşılaşması idi. Meydan sahibləri neçə oyundu qələbəyə həsrət idi. “Neftçi” də liderlər qrupundan uzaq düşmək istəmirdi. Bu səbəbdən də matça maraq böyük idi. Elçin Məsiyevin briqadası işinin öhdəsindən gəldi. Sürətli qarşılaşma olsa da, hakim tempə davam gətirə bilirdi, topun yaxınlığında olurdu. Çalışırdı ki, heç nəyi gözdən qaçırmasın. Xırda metodiki səhvləri nəzərə almasaq, qarşılaşmanı qüsursuz yola verdi.