İngiltərədə növbəti insident qeydə alınıb.
Arzuolunmaz hadisə premyer-liqanın 8-ci turunun “Mançester Siti” – “Bernli” matçında (2:0) baş verib. Yerli mənbələrin yaydığı xəbərə görə, polis iki azarkeşi həbs edib. Gənc fanatlar oyun zamanı homofob xarakterli şüarlar səsləndiriblər. Bundan başqa, ictimai asayişi pozmaqda və xidmətdə olan polis əməkdaşlarına hücum etməkdə şübhəli bilinən 20 yaşlı daha bir azarkeş də saxlanılıb.
Mançester şəhərinin Baş Polis İdarəsinin rəsmisi Ceymi Kollins ölkə futbolundakı növbəti belə hadisə haqda bunları deyib:
İngiltərədə növbəti insident
“Matça gələn fanatların çoxu özlərini ideal apardılar. Onlara təşəkkür edirik. Biz oyunlar zamanı yaxşı davranışları təşviq etmək və qayda-qanunları pozanları aşkar etmək üçün “Mançester Siti” ilə əməkdaşlıq edirik. Bunu dəqiqliklə demək istəyirəm: hüquq-mühafizə orqanları matçlar zamanı irqçiliyə və təhqirlərə əl atanlara qarşı qəti tədbirlər görəcək. Bizim hədəfimiz azarkeşlər, əməkdaşlar və oyunçuların təhlükəsizliyi ilə rahatlığını təmin etməkdi. Futbolsevərlərin matçlardan zövq almalarını istəyirik. Kiçik bir qrupun ümumi əhval-ruhiyyəni korlamasını istəmirik”.
