UEFA "Qarabağ"a nə üçün icazə verdi? - AÇIQLAMA
Konfrans Liqasının 3-cu turunda "Qarabağ" doğma meydanda "Kayrat"ı qəbul edəcək.
"Football-plus.az" saytının məlumatına görə, bir müddətdi ot örtüyünün yararsız olması səbəbindən Ağdam təmsilçisi oyunlarını Tofiq Bəhramov adına Respublika stadionunda keçirə bilmirdi. Görünür bu problem həll olunub. Çünki Qazaxıstan təmsilçisi ilə qarşılaşma "Tofiq Bəhramov"da baş tutacağı artıq rəsmiləşib. Bəs necə oldu ki, UEFA bu qərarı verdi? Nə zaman oyunun burda keçirilməsinə icazə verdi? Bu məsələlər ilə bağlı üz tutduq "köhlən atlar"ın mətbuat xidmətinin rəhbəri Gündüz Abbaszadəyə:"Qazonun vəziyyəti əladı. Biz UEFA-ya hər həftə hesabat göndərirdik, məlumat verirdik. Qurum əvvəlcədən bildirmişdi ki, ot örtüyü düzələndən sonra Tofiq Bəhramov adına Respublika stadionunda oynaya bilərsiniz. Bununla bağlı məlumat isə rəsmi açıqlama şəklində 11 oktyabr tarixində axşam saatlarında gəldi. Görüşləri artıq orda keçirə bilərsiniz deyə qeyd etdilər. Açığı daha öncədən ehtimal edirdik ki, oyun "Tofiq Bəhramov"da olacaq".
GÜNAY VƏLİYEVA
