Seçmə mərhələnin sonunu gözləmək vaxt itkisidi.

Son günlər Azərbaycan futbolunun gündəmində iki mövzu var: Canni de Byazi və onun rəhbərlik etdiyi milli komanda. Futbol ictimaiyyəti hər ikisindən narazıdı. Düzdü, azarkeşlər, futbol adamları ən çox AFFA-nı tənqid edir. Bir çoxları qurumun rəhbərliyində dəyişikliyin vacibliyini bildirirlər.
Bu yazıda sizə De Byazidən danışacağıq. 3 gün öncə "indeksonline" nəşrində belə bir xəbər yayıldı ki, italiyan mütəxəssis Kosovo millisini çalışdırmaq istəyir. Hələ mətbu orqan mütəxəssisin fikirlərinə də yer vermişdi:

Daha sonra AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla belə bir açıqlama verdi:

“Canni de Byazinin gələcək taleyinə müqavilə müddəti başa çatandan sonra aydınlıq gələcək. Seçmə mərhələ bitəndən sonra 65 yaşlı italiyalı mütəxəssisin hesabatı AFFA İcraiyyə Komitəsinə təqdim olunacaq. Daha sonra İK bu məsələni müzakirə edəcək. Milli komandaya baş məşqçinin təyin olunması, müqavilənin uzadılıb-uzadılmaması ilə bağlı məsələlərə dair qərar qəbul etmək səlahiyyəti yalnız bu quruma məxsusdu. Hələlik müqaviləsi var və sözləşməsinə uyğun millinin baş məşqçisi kimi fəaliyyətini davam etdirir. De Byazi mənimlə əlaqə saxlayaraq dedi ki, heç bir mətbu orqana orda göstərilən şəkildə açıqlama verməyib. Kosovo Futbol Federasiyasından onunla heç kim əlaqə saxlamayıb, bu söhbətin hardan qaynaqlandığı ilə bağlı təsəvvürü yoxdu. Yəni xarici mətbuatda yazılanlar həqiqəti əks etdirmir. Heç kimə elə sözlər demədiyini söylədi".

Gördüyünüz kimi, yenə aləm dəyib bir-birinə. De Byazinin millimizin başında olduğu ikinci ildə 5-ci belə haldı. Hardasa xəbər çıxır, AFFA təkzib edir. Bir müddət sonra yenə eyni şey...
İndi məsələ tam fərqlidi. De Byazi seçmə mərhələnin sonuna kimi milli ilə müqavilə bağlayıb. Yığmanın isə 1 rəsmi, 1 yoxlama matçı qalıb. Lüksemburq və Qətərlə qarşılaşmalar Bakı Olimpiya Stadionunda keçiriləcək. Bu oyunlarda qazanılacaq nəticələr millinin qrupdakı vəziyyətinə təsir etməyəcək. Onsuz da axırıncıyıq. Bu konkretləşib. Mediada gəzən məlumatlara görə, AFFA italiyalı mütəxəssislə müqavilə yeniləmək niyyətində deyil. Belə olan halda De Byazi ilə sağollaşmaq olar. Bəs onda federasiya rəsmiləri nə üçün bu addımı atmır?

Əslində ən doğru məqam seçmə mərhələnin sonunu gözləməkdi. Çünki rəsmi müqavilə var. Bunu pozan tərəf AFFA olsa, gərək təzminat ödəsin. Belə olan halda isə federasiya bizə bəlli olmayan məbləğdə pul itirəcək. Bu zaman AFFA nə edə bilər? De Byazi ilə masa arxasında oturub, qarşılıqlı razılıq əsasında noyabr ayı üçün maaşını verib, sağollaşa bilər. Təbii ki, bunda italiyalı mütəxəssis də maraqlı olmalıdı. Amma fikrimizcə, federasiyadan belə bir təklif olsa, De Byazi imicini düşünərək millimizdən ayrıla bilər. Çünki Lüksemburq və Qətərə uduzmaq onun imicinə zərbə vura bilər. Bu səbəbdən də belə bir təklif italiyalı üçün göydəndüşmə olacaq.

Azərbaycan üçün isə ən əla məqam De Byazinin elə öz istəyi ilə istefa verib, getməsi olar. Amma italiyalı bu addımı atarmı? Bax, bu həqiqətən də düşündürücü sualdı. Əslində AFFA heç nəyə fikir vermədən, nəticələrin qənaətbəxş olmadığını nəzərə alaraq italiyalının təzminatını ödəyib, yola salmalıdı. Onsuz da boş-boş yerlərə o qədər pullar xərclənib ki... Bu da onlardan biri olar. Bundan sonra başqa yerə getmək lazım deyil. Elə Arif Əsədovun başçılıq etdiyi məşqçilər korpusu yığmanın son iki oyununu yola verə bilər. Bununla da federasiya azarkeşlərin istəyini nəzərə almış olacaq və ictimaiyyət arasında zədələnən imicini az da olsa, düzəldəcək.

İLKİN SULTANLI