De Byazi millimizdən ayrılır? - RƏSMİ AÇIQLAMA
Xəbər verdiyimiz kimi, "İndeksonline" nəşri Canni de Byazinin Kosovo yığmasının “sükanı arxasına” keçmək istədiyini yazıb.
Nəzərinizə çatdıraq ki, baş məşqçinin Azərbaycan millisi ilə DÇ-2022-nin seçmə mərhələsinin sonuna kimi müqaviləsi var. Belə olan halda, o, özünə necə yeni iş axtara bilər? Görəsən, AFFA italiyalı mütəxəssisin bu istəyindən məlumatlıdı? Ümumiyyətlə, De Byazi haqda federasiyanın qərarı necə olacaq?
Suallarımızı AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdullaya ünvanladıq:
“Canni de Byazinin gələcək taleyinə müqaviləsi başa çatdıqdan sonra aydınlıq gələcək. Seçmə mərhələ bitdikdən sonra 65 yaşlı italiyalı mütəxəssisin hesabatı AFFA İcraiyyə Komitəsinə təqdim olunacaq. Daha sonra İK bu məsələni müzakirə edəcək. Milli komandaya baş məşqçi təyin olunması, müqavilənin uzadılıb-uzadılmaması ilə bağlı məsələlərə dair qərar qəbul etmək səlahiyyəti yalnız bu quruma məxsusdu. Hələlik müqaviləsi var və sözləşməsinə uyğun millinin baş məşqçisi kimi fəaliyyətini davam etdirir".
AFFA rəsmisi De Byazinin Kosovo yığmasının “sükanı arxasına” keçmək istəməsi ilə bağlı yayılan xəbərə də münasibət bildirdi:
"De Byazi mənimlə əlaqə saxlayaraq dedi ki, heç bir mətbu orqana orda göstərilən şəkildə açıqlama verməyib. Kosovo Futbol Federasiyasından onunla heç kim əlaqə saxlamayıb, bu söhbətin hardan qaynaqlandığı ilə bağlı təsəvvürü yoxdu. Yəni, xarici mətbuatda yazılanlar həqiqəti əks etdirmir. Heç kimə elə sözlər demədiyini söylədi".
İLKİN SULTANLI
