Şengeliya turun oyunçusu sayıldı, “Jalgiris” baş məşqçini qovdu
Qəzetimizin ötən sayında basketbol üzrə Avroliqanın 2-ci turunun nəticələrini təqdim etmişdik.
Səfərdə “Efes”ə 100:96 hesabıyla qalib gələn ÇSKA-nın bu uğurunda Tornike Şengeliya önəmli rol oynayıb. 23 xal toplayan, 4 ribaund edən və 3 məhsuldar ötürmə verən 30 yaşlı gürcü hücumçu 2-ci turun ən yaxşı oyunçusu sayılıb. O, “Efes” üzərində qələbədən sonra fikirlərini bölüşüb: “Bu oyun trillerə bənzədi. Rəqibin də haqqını vermək lazımdı, türklər təslim olmurdular. Elə biz də. Onların xal fərqini, demək olar ki, aradan qaldırmasına baxmayaraq, soyuqqanlığımızı qoruduq və baş məşqçinin oyun planına sona qədər əməl etdik. Hər kəs həm müdafiədə, həm də hücumda iştirak etdi”.
Avroliqa ilə bağlı daha bir xəbər var. Mövsümə iki məğlubiyyətlə başlayan “Jalgiris”in rəhbərliyi baş məşqçi Martin Şilleri istefaya göndərib.[/b]
Avstriyalı mütəxəssis Litva klubuna 2020-nin yayından bəri rəhbərlik edirdi. Onun boşaltdığı postu Yure Zdovts tutacaq. O, komandanın “sükanı arxasına” yaxın günlərdə - təyinatla bağlı bütün formallıqlar aradan qalxandan sonra keçəcək. Hələ ki “Jalgiris”də baş məşqçinin səlahiyyətlərini Arne Voltmann yerinə yetirir.
