Karpin ilə müqavilədəki şərt qüvvəyə minəcək
Rusiya yığmasının dünən qələbə qazanması Valeri Karpinin mövqeyini möhkəmləndirib.
Şimal qonşumuzun komandası DÇ-2022-nin seçmə oyununda Sloveniyaya qalib gələrək (2:1) H qrupunda liderliyi ələ alıb. Rusiya yığması artıq Karpinin rəhbərliyi altında keçirdiyi 5 matçdan 4 qələbə və 1 heç-heçə ilə ayrılmaqla 13 xal toplayıb. 52 yaşlı mütəxəssis bu göstəriciyə əsasən komandanın sabiq çalışdırıcılarından Dik Advokaat (ilk 5 oyuna 12 xal), Quus Hiddink və Georgi Yartsevi (hər ikisi 11) arxada qoyub, Oleq Romantsev, Valeri Qazzayev və Fabio Kapellonun nəticəsini (13) isə təkrarlayıb. Maraq üçün Rusiya yığmasında bu planda rekordçunun Pavel Sadırin ilə Leonid Slutski (hər ikisi 15) olduğunu da qeyd edək.
Karpin milli komandaya iyulda təyinat alıb. Yığma artıq azı DÇ-2022-nin seçmə pley-off oyunlarında iştirakını təmin edib. Bu vəzifənin həlli isə baş məşqçi ilə müqavilədəki bir şərtin qüvvəyə minəcəyindən xəbər verir. Yerli futbol qurumunun prezidenti Aleksandr Dyukov Karpin ilə sözləşmənin yenilənəcəyini bildirib: “Bəli, pley-off oyunlarında iştirakımızı təmin etmişiksə, müqavilənin yenilənəcəyi aydınlaşıb. Amma, əlbəttə ki, dünya çempionatına birbaşa vəsiqə qazanmaq daha yaxşı olardı”.
