Ronaldo sentyabrda hamıdan yaxşı oldu
İngiltərə premyer-liqasında sentyabrın ən yaxşıları müəyyənləşib.
Ən yaxşı baş məşqçi və oyunçu üçün ayrılan mükafatlara müxtəlif klubların üzvləri layiq bilinib.
Ötən ayın ən yaxşı məşqçisi “Arsenal”ı çalışdıran Mikel Arteta seçilib. Onun komandası sentyabrda keçirdiyi 3 matçda maksimum nəticə göstərmişdi: “topçular” evdə “Norviç” (1:0) və “Tottenhem”ə (3:1), səfərdə isə “Bernli”yə (1:0) qalib gəlmişdilər. 39 yaşlı Arteta məlum nominasiyada digər namizədləri - Xosep Qvardiola (Mançester Siti), Yürgen Klopp (Liverpul), Qrem Potter (Brayton) və Din Smiti (Aston Villa) qabaqlayıb.
Premyer-liqada sentyabrın ən yaxşı futbolçusu üçün nəzərdə tutulan mükafata isə Kriştiano Ronaldo layiq görülüb. “Mançester Yunayted”in hücumçusu ötən ay meydana çıxdığı 3 matçda 3 qol vurmuşdu. 36 yaşlı futbolçu fərdi mükafat uğrunda mübarizədə Joao Kanselu (Mançester Siti), Məhəmməd Salah (Liverpul), Antonio Rüdiger (Çelsi), Allen Sen-Maksimen (Nyukasl) və İsmaila Sarrı (Uotford) geridə qoyub.
Qeyd edək ki, Ronaldo daha əvvəl MY-nin də ötən ay üçün ən yaxşı futbolçusu seçilmişdi. O, son seçimin nəticəsi ilə bağlı şəxsi “instaqram” səhifəsində bu cümlələri yazıb: “Premyer-liqada çox yaxşı futbolçular arasında ayın oyunçusu seçilməyimlə fəxr edirəm. Bunu “Mançester Yunayted”dəki bütün komanda yoldaşlarımın sayəsində bacardım. Onlarsız buna nail ola bilməzdim. Gəlin, çox çalışaq və nəticələr gələcək”.
