İspaniya çempionatında sentyabrın ən yaxşı oyunçusu müəyyənləşib.

Bu nominasiyada Kərim Benzema qalib gəlib. “Real”ın hücumçusu ötən ay La Liqada meydana çıxdığı 4 oyunda 6 qol vurmuşdu. 33 yaşlı fransalı futbolçunun sentyabrda “qol+ötürmə” sistemi üzrə 10 xal (6+4) topladığını da qeyd edək.

Yeri gəlmişkən, Benzema Avropanın 5 aparıcı liqasında ən yaxşı futbolçuların son reytinq siyahısına da başçılıq edir. “Sky Sports“ telekanalının yaydığı xəbərə görə, siyahıya 35 oyunçu daxil edilib. Reytinq cədvəli hazırlanarkən futbolçuların müxtəlif göstəriciləri nəzərə alınıb. Diqqəti cəlb edən məqam Kriştiano Ronaldo (MY) ilə Lionel Messinin (PSJ) bu mövsüm qazandıqları əmsala görə ilk “10-luğ”a düşə bilməmələridi.

1. Kərim Benzema (Real) 22,881
2. Məhəmməd Salah (Liverpul) 20,640
3. Erlinq Holann (Borussiya D) 19,164
4. Kilian Mbappe (PSJ) 18,781
5. Edin Ceko (İnter) 17,323
6. Mikel Oyarsabal (Real Sosyedad) 17,193
7. Əşrəf Hakimi (PSJ) 16,801
8. Teci Savanye (Monpelye) 16,664
9. Florian Virts (Bayer-04) 16,630
10. Dimitri Payet (Marsel) 16,335