“Beşiktaş”ın zədəliləri çox olduğu üçün Bərkay oynamağa şans qazandı" - Milan Obradoviç
AÇ-2023-ün seçmə mərhələsində 21 yaşadək futbolçulardan ibarət Azərbaycan millisi Finlandiya ilə qarşılaşıb.
"Football-plus.az" saytının məlumatına görə, yığmanın baş məşqçisi Milan Obradoviç matçdan sonra mətbuat konfransında çıxış edib. O, görüş haqda bunları deyib:
- İlk hissəyə istədiyimiz kimi başladıq. Orta sahədə üstünlük bizdə idi. Öz oyunumuzu oynamağa başladıq. İmkanlarımız oldu, ancaq dəyərləndirə bilmədik. 2-3 əks hücumumuz olsa da, qolla nəticələnmədi. İlk hissədə rəqibin qol imkanı olmadı. İkinci hissədə - 55-60-cı dəqiqə arasında görünürdü ki, komandamız fiziki olaraq yorulub. Həmin ərəfədə Finlandiya 2-3 təhlükəli hücum yaratdı. Sonradan toparlandıq və oyunumuzu oynamağa başladıq. Futbol belədi, sən qol vura bilmirsənsə, rəqib səni cəzalandıracaq. Sonda qolumuzu vurduq. Təəssüflər olsun ki, qələbə qazana bilmədik. Komandamızı dəstəkləyən azarkeşlərə təşəkkür edirəm. Bizə burada oynamaq çox xoşdu.
- Sumqayıtı belə bəyənirsizsə, nə üçün gələn ay olacaq oyunları Bakıda keçirəcəksiz?
- Burada oynamaq bizə çox xoşdu. Mənə qalsa, razıyam. Amma tək burada oynamalı deyilik. Məndən olsa, hər bölgədə - Masazırda, Qəbələdə, Naxçıvanda oynamaq istəyərəm.
- Rəqib azlıqda idi. 1 xal qazandınız, ya 2 xal itirdiniz?
- Əlbəttə, 2 xal itirdik. Rəqib çox yaxşı və sürətli komandadı. Həqiqətən, əlimizdən gələni etdik. Çox güc sərf etdik. İmkanlarımız var idi, amma təəssüflər olsun ki, alınmadı.
- Oktyabrın 12-də Xorvatiya ilə oyun var. Fkirləriniz nədir?
- Qarşıda 4 gün var. Heyətdə 23 futbolçu var. Hər biri oynamağa layiqdi. Daha çox hazır olan oyunçular oynayacaq.
- Hesab bərabərləşəndən sonra futbolçulara səslənirdiz ki, tələsməyin. Nə üçün belə edirdiz?
- Tələsmə deyərək, top itirməmələrini istəyirdim. Onlar mənim nə istədiyimi yaxşı bilirlər. Bir az dincəlmək və sonra hücum etmək lazım idi.
- “Beşiktaş”ın futbolçusu Bərkay Vardarı milliyə dəvət etməyi düşünürsüz?
- Berkay bizim U-19 komandamızın oyunçusudu. "Ayaks" - “Beşiktaş” matçına baxdım. “Beşiktaş”ın zədəliləri çox idi. Bərkay buna görə şans qazandı. Onu izləyirik, hər şey onun özündən asılıdı. Əsas məsələ bundadı ki, o, Azərbaycan yığmasında oynamaq istəyir, yoxsa Türkiyədə.
