Arif Əsədov Rəşad Sadıqovun iradını ciddi saymır - AÇIQLAMA
“Komandamdan milliyə futbolçu dəvət olunmadığını biləndə, açığı, özüm də çox təəccübləndim. Bu gün kollektivdə yığmaya layiq futbolçular var. Məşqçinin qərarıdı. Oyuna 5-6 saat qalmış yığmaya dəvət alanların siyahısının açıqlanması bir az qəribə oldu. Son bir neçə toplanışda iştirak edən futbolçularım bu gün çağrılmadı. Yığma hər futbolçu üçün önəmlidi. Təkcə heyətin belə açıqlanması məyusedici oldu. Heyət oyundan sonra və ya 1-2 gün əvvəl açıqlana bilərdi” - bu sözləri Rəşad Sadıqov 6-cı turun “Zirə” – “Sumqayıt” matçından sonra keçirilən mətbuat konfransında deyib.
Onun narazılığına səbəb olan məsələ ilə bağlı Canni de Byazinin köməkçisi Arif Əsədovla əlaqə saxladıq: “Açığı, Rəşad bəyin fikrinə münasibət bildirmək istəmirəm. Bu, onun fikridi. Biz indi təlim-məşq toplanışındayıq. Nəsə deyərəm, səhv anlaşılar. Ona görə də bu məsələ haqda danışmaq istəmirəm. Məni düzgün başa düşün”.
Bununla belə, təcrübəli mütəxəssisdən heyətin oyuna saatlar qalmış açıqlanması ilə bağlı bir neçə kəlmə qopardıq:
[b
]“Buna elə də önəm verməyin. Bilirsiz, bu haqda baş məşqçi qərar verir. Ola bilər, 1 gün əvvəl açıqlansın, elə də olar ki, 2 gün sonra. Fikrimcə, burda heç bir niyyət güdülmür. Yəni bu məsələni ciddi saymıram. Buna görə də cavab vermək istəmirəm. Elə bir şey deyil ki, durub fikir bildirim. Baş məşqçi qərar verir. Onun da fikrinə hörmətlə yanaşmaq lazımdı. Əks tərəfdən də nəsə varsa, onu baş məşqçidən soruşun. Mənim münasibət bildirməyim düzgün olmaz”.
[/b]SƏNƏM FƏRHADOVA
