Mbappe etiraf etdi, Peres tarix göstərdi və..
Nəhayət, Kilian Mbappe bu yay başqa kluba keçmək istəyində olduğunu etiraf edib.
PSJ-nin hücumçusu bu barədə “RMC Sport”a açıqlamasında deyib. 22 yaşlı futbolçu bir neçə ay əvvəl klub rəhbərliyindən onu buraxmasını istəyib: “Yeni müqavilə təklifini geri çevirdim. Klubdan yeni transfer üçün pul qazanmasını və mənim yerimə keyfiyyətli oyunçu almasını istədim. Hər şeyin hörmətlə sona çatmasını istəyirdim. Buna görə də kluba ayrılmağımı istəməyəcəkləri halda qalmağa hazır olduğumu söylədim. Amma müqaviləmi yeniləmək üçün aldığım 7 təklifi rədd etdiyim doğru deyil. PSJ mənə çox şey verdi. Son dörd ildə bu klubda həmişə xoşbəxt olmuşam. İndi də xoşbəxtəm”.
Mbappenin PSJ ilə müqaviləsinin müddəti 2022-ci ilin yayında sona çatacaq. Onun “Real”ın maraq dairəsində olduğu hamıya bəllidi. Xatırladaq ki, Madrid klubu bu yay fransalı oyunçu üçün iki təklif göndərsə də, Paris klubundan rədd cavabı almışdı. Yeri gəlmişkən, İspaniya nəhəngi artıq qış “transfer pəncərəsi” dövründə dünya çempionunun keçidini həll etməyi planlaşdırır. Bu barədə klubun prezidenti Florentino Peres açıqlama verib. O, qışda 22 yaşlı hücumçunu almağa çalışacaqlarını bildirib:“Ümid edirəm ki, yanvar ayının 1-dək hər şeyi həll edəcəyik”.
Amma bu gün Peres KİV-in onun açıqlamasını düzgün yozmadığını da bildirib:“Məni düzgün başa düşməyiblər. Mən bu məsələ ilə bağlı hər hansı yeni xəbər almaq üçün gələn ilə qədər gözləməli olacağımızı demək istəmişəm. Biz həmişə PSJ-yə hörmətlə yanaşmışıq. Bu klubla əla münasibətlərimiz var”.
