Fərdi Kadıoğlunun atası Kuntsun cavabını verdi
Türkiyə yığmasının yeni baş məşqçisi Ştefan Kunts dünən federasiyanın bazasında jurnalistlərlə söhbət edib.
Bir çox mövzulara toxunan almaniyalı mütəxəssisin tam müsahibəsi ilə ''Futbol+''in cümə axşamı işıq üzü görəcək sayında tanış ola biləcəksiz. Kuntsun ''Fənərbaxça''lı Fərdi Kadıoğlu haqda danışarkən işlətdiyi sözlər diqqət çəkib. Qeyd edək ki, anası kanadalı, atası türk olan Fərdi Niderlandın gənclər yığmasında çıxış edir. Əsas yığma mövzusunda isə o uzun müddətdi qərar qəbul edə bilmir.
Gənc futbolçunun Kanada, Niderland və Türkiyəni seçmək şansı var. Kunts bu oyunçuyla bağlı bunları deyib: ''Fərdi əvvəlcə hansı yığmanı seçəcəyinə qərar verməlidi. Sonra Türkiyə vətəndaşlığını almaq üçün müvafiq yerlərə müraciət etməlidi. Sonra da FİFA-ya üz tutulmalı və məsələ həll olunmalıdı''.
Kuntsun bu sözlərindən dərhal sonra Fərdinin atası Feyzulla ona tutarlı cavab verib. Oğlunun şəxsiyyət vəsiqəsini paylaşaraq onun artıq Türkiyə vətəndaşlığının olduğunu xatırladan Feyzulla Kadıoğlu ''qalanını federasiyanın öhdəliyinə buraxıram'' sözünü yazıb. Türkiyə mətbuatının yazdığına inansaq, istedadlı futbolçu artıq qərarını Türkiyənin lehinə verib.
Kuntsun 21 yaşlı oyunçu ilə bağlı dediyi sözlər onu göstərir ki, almaniyalı ya Fərdinin Türkiyə vətəndaşı olduğunu bilmir, ya da o, bu faktı unudub. Bu durum Şenol Günəşin başına gələnləri xatırlatdı. Təcrübəli mütəxəssis 2019-ci ildə verdiyi açıqlamada Nazim Sanqarenin Türkiyə vətəndaşı olduğunu bilmədiyini etiraf etmişdi.
