Azərbaycan premyer-liqasının 6-cı turunda "Qarabağ" "Qəbələ"yə 2:0 hesabı ilə qalib gəlib.

Qarşılaşmadan sonra "qırmızı-qaralar"ın baş məşqçisi Elmar Baxşıyev mətbuat konfransında iştirak edib.

"Qəbələ"nin baş məşqçisi əvvəlcə oyun haqda fikirlərini səsləndirdi:

"Bilirdik ki, çempionatın liderinə qarşı oynayırıq. "Qarabağ"ın reklama ehtiyacı yoxdu. Oturuşmuş heyəti var, hər komandaya qarşı üstün oyun göstərirlər. Bizim də oyuna görə planımız var idi. Daha öndə başlamaq istəyirdik. Nə qədər alınırdı, ya yox, bilmirəm. Amma komandam zaman-zaman verdiyim tapşırıqların öhdəsindən gəlirdi. Yenə də ümumi götürsək, futbolçularımın oyunundan razı qaldım. İnanıram ki, get-gedə daha da inkişaf edə bilərik"

- Utziq bir epizod da real qol imkanını qaçırdı. Bundan sonra "Qarabağ" əks-hücumda sizi cəzalandırdı. Bunu oyunun qırılma nöqtəsi hesab edirsiz?
- Qırılma nöqtəsi deməzdim. "Qarabağ"ın çox şans verməyəcəyini bilirdik. Əlimizə düşən fürsətləri dəyərləndirsək, rəqibi təzyiq altında saxlaya bilərdik. Amma inanıram ki, növbəti oyunlarda bunlardan istifadə edəcəyik.

- Akakpo və Rüfətin zədələnməsindən sonra "Qəbələ"nin oyununda düşüş hiss olunur. Bunun səbəbi nədi?
- Düşüşü nədə görürsüz? Mən fərqli yanaşıram. İkisi də mənim üçün vacib oyunçudu. Düzdü, rotasiyalar etmək üçün ehtiyat qüvvəmiz azdi. Ümumi olaraq komanda meydançada istədiyimi verir.

- Komanda çox ofsayda çox düşdü. Bunun səbəbi nədi? Oyunçular qaydanı bilmirlər, ya necə?
- Ofsayda düşmək normaldı. Futbolun içində olan bir qaydadı. Sadəcə, "Qarabağ"ın oyunçularının ustalığı yüksəkdi. Onların sayəsində futbolçular ofsayda düşürdü.