Laportadan Kumanın aqibəti ilə bağlı son açıqlama
Ronald Kumanın “Barselona”da qalmaq perspektivinin bir qədər də dumanlı göründüyü güman edilirdi. Lakin...
Komanda Çempionlar Liqasının qrup mərhələsinin 2-ci turunda “Benfika”ya böyük hesabla uduzandan (0:3) sonra onun baş məşqçi vəzifəsindən istefaya göndərilmək ehtimalının daha da artdığı söylənilirdi. Əksər mənbələrdə klub rəhbərliyinin Kuman ilə yollar ayrılacağı təqdirdə baş məşqçi vəzifəsinə Andrea Pirlonun təyinat alacağını, buna əsas kimi prezident Xuan Laportanın artıq bu məsələ ilə bağlı 43 yaşlı italyan çalışdırıcı ilə bir neçə dəfə görüşməsi göstərilirdi. Lakin cümə axşamı rəhbərliyin 58 yaşlı Kumanı istefaya göndərməyə tələsmədiyi məlum olmuşdu. Belə ki, Laporta komandadaxili atmosferin daha da gərginləşməməsi üçün niderlandlı mütəxəssisə son şansı verməyi zəruri sayırdı. Hər halda yerli mənbələrdə həmin şansın La Liqanın növbəti oyunu üçün nəzərdə tutulduğu vurğulanırdı: Kumanın aqibətini “Atletiko” ilə dünənə təyin olunan səfər matçı müəyyən edəcəkdi.
Lakin bu iddia da doğru çıxmayıb. Çünki Laporta “Marka” qəzetinə son açıqlamasında bu xəbərlərin həqiqətəuyğun olmadığını deyib:
[b]
“Atletiko” ilə matçın nəticəsindən asılı olmayaraq, Kuman komandada qalacaq. Onunla danışmışam. Birlikdə işlədiyin əməkdaşlara müəyyən məqama qədər etimad göstərmək lazımdı. Ümid edirəm ki, hər şey yaxşıya doğru dəyişəcək. Zədəli futbolçulardan bəziləri sağalıb, hamısı tezliklə sırada olacaqlar. Deməli, məşqçimizin heyətlə bağlı problemi aradan qalxacaq. Əlavə olaraq onu da deyim ki, Kuman ən çətin vaxtda “Barselona”ya başçılıq etməyə razılaşıb. O, üzərinə ağır məsuliyyət götürüb. Kumanla yaxşı və səmimi münasibətlərimiz var. Ronald yaxşı adamdı və o da mənim haqqımda belə düşünür. Hamımız vəziyyəti “Barselona”nın xeyrinə yaxşılaşdırmağa çalışırıq”.
[center]
