Dünən Avropa Liqasının qrup mərhələsinin 2-ci turu çərçivəsində ''Qalatasaray'' ''Marsel'' səfərindən qolsuz bərabərliklə qayıdaraq xalını 4-ə yüksəltdi və qrupda liderliyini davam etdirdi.

''Velodrom'' stadionunda keçirilən matçın çox gərgin ab-havada keçəcəyi gözlənilirdi və belə də oldu. Çünki 2012-ci ildə ''Fənərbaxça'' da bu stadiona səfər edərkən fransalı və türkiyəli fanatlar arasında ciddi olaylar yaşanmışdı.

Əslində dünənki qarşılaşmada tribunalarda hərarəti qaldıran məhz yerli fanatlar oldu. İlk hissənin gedişində ''Marsel''in fanat qruplaşmalarının olduğu tribunada dəfələrlə PKK terror qruplaşmasının, eləcə də Yunanıstan və Ermənistanın bayraqları açıldı. Hətta PKK-nı dəstəkləyən tezahüratlar da səsləndirildi. ''Qalatasaray''lılar da bu təxribata cavab vermək istəyən kimi yerli polislər onları bibər qazı ilə sakitləşdirməyə çalışdı. Halbuki yerli fanatlara gözün üstdə qaşın var da deyən olmadı. Hətta Fatih Terim də olaya müdaxilə etməli oldu və ilk hissədə oyun təxminən 7-8 dəqiqə dayandırıldı.
Tribunadakı bu gərginlik oyunçulara da sirayət etdi. 75-ci dəqiqədə Van Anholta mübarizə zamanı Genduzi özünü açıq-aşkar yerə atsa da, hakim Pavel Raçkovski ''nöqtə''ni gösterdi. Amma polşalı hakim VAR-ın məsləhəti ilə epizodu monitordan izlədikdən sonra səhvini düzəldərək qərarını dəyişdi.

Bu qərar meydan sahiblərinin və xüsusilə də Genduzinin xoşuna gəlmədi. Onunla Van Anholt arasında atışma oyundan sonra da davam etdi. Bu arada təcrübəli niderlandlı müdafiəçi sosial şəbəkədə uzunsaçlı fransalıya sataşmağı lazım bildi. O öz ''tvitter''ində ''VAR yanıldığını sübut etdikdən sonra ağzın hələ də dayanmır. Deyəsən beyninin rahatlaşması üçün o pariki başından çıxartmalı olacam'' sözlərini yazaraq bir neçə il öncə ''Mançester Yunayted''li Maruan Fellaininin oyun epizodu zamanı Genduzinin saçlarını dartmasının videosunu paylaşıb.

Bundan başqa matçın son anlarında Saliba ilə Dianye arasında da böyük qalmaqal yaşandı və yan xəttin yanında ikili bir-birinin boğazından yapışdı. Digər oyunçuların araya girməsi ilə aranı sakitləşdirmək mümkün oldu. Dianye də oyundan sonra bununla bağlı paylaşım edib. ''İnstaqram''da həmin epizodun şəklini paylaşan seneqallı forvard ''səni bu yaxınlarda öz evimizdə səbirsizliklə gözləyirik. Dünyanın ən yaxşı fanatlarına sahibik'' sözlərini yazıb.