Rusiyalı tennisçi Yelena Vesninanın başına maraqlı iş gəlib.
“Komsomolskaya pravda”nın yaydığı xəbərə görə, onun oğurlanan medalları qaytarılıb. Oğrular mükafatları 35 yaşlı tennisçinin yaşadığı Moskvaətrafı elit qəsəbələrdən birində yerləşən nəzarət-buraxılış məntəqəsində təhvil veriblər. Üstəlik medalların yanında şokolad qutusu və üzrxahlıq məktubu qoyublar.
Xatırladaq ki, tennisçi noyabrın 11-də evinin qarət olunduğunu xəbər vermişdi. Yelenanın evindəki seyf sındırılmış, iki olimpiya medalı və zərgərlik məmulatları oğurlanmışdı. Vesnina 2016-da keçirilən Rio-de-Janeyro Olimpiadasında cütlərin yarışında qızıl medal qazanmışdı. Yenicə başa çatan Tokio Olimpiadasında isə mikstdə gümüşə yiyələnib.
