Ronald Kumanın “Barselona”da qalmaq perspektivi indi bir qədər də dumanlı görünür.

Komandanın Çempionlar Liqasının qrup mərhələsinin 2-ci turunda “Benfika”ya böyük hesabla uduzması (0:3) onun baş məşqçi vəzifəsindən istefaya göndərilmək ehtimalını daha da artırıb.

Əksər mənbələrdə klub rəhbərliyinin bu gün iclas keçirəcəyi bildirilib. “AS” qəzetinin xəbərinə görə, Kuman ilə yollar ayrılacağı təqdirdə baş məşqçi vəzifəsinə əsas namizəd Andrea Pirlo hesab olunacaq. Prezident Xuan Laportanın artıq bu məsələ ilə bağlı 43 yaşlı çalışdırıcı ilə bir neçə dəfə görüşdüyü iddia edilir.

Lakin rəhbərliyin 58 yaşlı Kumanı bu gün istefaya göndərməyə tələsmədiyi də bildirilir. Belə ki, Laporta komandadaxili atmosferin daha da gərginləşməməsi üçün niderlandlı mütəxəssisə son şansı verməyi zəruri sayır. Həmin şans isə La Liqanın növbəti oyunu üçün nəzərdə tutulub: Kumanın aqibətini “Atletiko” ilə oktyabrın 2-nə təyin olunan səfər matçı müəyyən edəcək.