"Omoniya"nın üstün tərəfi budu" - Qurban Qurbanov
Konfrans Liqasının qrup mərhələsində "Qarabağ" səfərdə "Omoniya"nın qonağı olacaq.
"Football-plus.az" saytının məlumatına görə, dünən mətbuat konfransı keçirilib. Ağdam təmsilçisinin baş məşqçisi Qurban Qurbanov oyun haqda öz fikirlərini bölüşüb:“Son vaxtlar bu ölkəyə tez-tez gəlirik. Yenidən burada olmaq mənim üçün xoşdu. Qarşılaşdığımız hər komandanın öz oyun fəlsəfəsi var. "Omoniya" həmin rəqiblərdən bir az fərqlidi. Sabah meydanda daha çox düşünmək lazım gələcək. Burada yaxşı oyun göstərmək istəyirik. Meydanda əlimizdən gələni edəcəyik. Bu komandaya qarşı həm ehtiyatlı olmalı, həm də 90 dəqiqə ərzində rəqibi nəzarətdə saxlamalıyıq. İnanıram ki, sabah ən yaxşı matçlarımızdan birini keçirəcəyik.
Kipr komandaları meydanda böyük xarakter göstərirlər. Bu rəqiblərə qarşı çox diqqətli və istəkli olmalıyıq. Son vaxtlar "Apoel"-lə bəzi oyunlarda qələbə qazanmışıq, bəzilərində uduzmuşuq. Amma hər bir görüş azarkeşlər üçün maraqlı olub. Futbolçularım bu matçlarda sonadək mübarizə aparmağı hiss etdilər. Onlar üçün böyük faydası oldu.
"Omoniya" öz oyun dəsti-xətti ilə seçilən komandadı. Oyun ərzində bunu meydanda göstərməyə çalışırlar. Qarşımızda baş məşqçinin bütün tapşırıqlarını yerinə yetirə bilən bir kollektiv var. Komanda oyununa üstünlük verən rəqibə qarşı mübarizə aparacağıq. Bu, "Omoniya"nın ən üstün tərəflərindən biridi. Heyətində fərdi keyfiyyətləri yüksək olan futbolçular var.
Qələbə qazanmaq üçün daha çox hücumda oynamalıyıq. Amma rəqib oyun sistemini dəyişməklə bizə sürpriz edə bilər. Çünki Qazaxıstan "Kayrat"ına qarşı məhz belə etmişdilər. Rəqibi xeyli analiz etmişik. Əsas oyunçularımızın diqqətli olması və ruhdan düşməməsidi".
Qeyd edək ki, GSP stadionunda baş tutacaq “Omoniya” – “Qarabağ” matçı 23.00-da başlayacaq.
