UEFA Avropa Superliqası layihəsindən geri çəkilməyən “Real”, “Barselona” və “Yuventus”a qarşı sanksiyaları ləğv edib.
Qitənin futbol qurumu bu addımı atmağa, sadəcə, məcbur olub.
Xatırladaq ki, bir neçə gün əvvəl İspaniyanın Madrid şəhərinin 17 saylı məhkəməsindən UEFA-ya ultimatum verilmişdi. Hakim Manuel Ruis de Lara qurumun prezidenti Aleksander Çeferindən Avropa Superliqasının təsisçiləri olan klublara qarşı sanksiyalarla bağlı qərarların ləğvini istəmişdi. UEFA-ya bunun üçün 5 günlük möhlət verilmişdi. Məhkəmə qitə futbol təşkilatından “Real”, “Barselona” və “Yuventus”a qarşı nəzərdə tutulan bütün sanksiyaların ləğvini tələb etmişdi. Məhkəmənin qətnaməsində “UEFA-nın bu klublarla bağlı sanksiyaların ləğvi istiqamətində hər hansı addım atdığını sübut etmədiyi” vurğulanmışdı. Qitə futbol qurumu yaxın günlərdə rəsmi saytı vasitəsilə məhkəmədən xəbərdarlıq aldığını göstərən məlumatı dərc etməli idi. Əks halda prezident Çeferin itaətsizliklə bağlı maddə üzrə cinayət məsuliyyətinə cəlb oluna bilərdi.
Onu da yada salaq ki, UEFA bir müddət əvvəl Avropa Superliqasının təşkili ilə bağlı məhkəməni uduzmuşdu. Futbol qurumu bu səbəbdən təsisçi klublara qarşı sanksiyaları ləğv etməyə borclu idi. Məhkəmə 3 klubla bağlı intizam işinə son qoyulmasına, həmçinin böyük təzyiq qarşısında qalaraq Superliqa ideyasından geri çəkilən digər 9 kluba tətbiq edilən cərimə və məhdudiyyətlərin ləğvinə qərar vermişdi. Qərarda həmçinin məlum işə Avropa İttifaqının Lüksemburqakı məhkəməsinin baxacağı da qeyd edilmişdi. Beləliklə, UEFA-nın Avropa futbolunda inhisarçı mövqeyi qəti şəkildə pislənmişdi.
Avropanın ali futbol qurumunun bəyanatında Superliqanın əsas təsisçiləri olan 3 klubu cəzalandırmayacağı bildirilib. Həmçinin hələ ki kağız üzərində olan yeni turnirin yaradılmasında iştirak edən, daha sonra isə geri çəkilən digər 9 kluba qarşı da heç bir sanksiya tətbiq edilməyəcək. Bir daha xatırladaq ki, aprelin 18-də “Mançester Yunayted”, “Mançester Siti”, “Arsenal”, “Liverpul”, “Tottenhem”, “Çelsi” (hamısı İngiltərə), “Real”, “Barselona”, “Atletiko” (hamısı İspaniya), “Yuventus”, “Milan” və “İnter” (hamısı İtaliya) klubları Avropa Superliqasını yaratdıqlarını bəyan etmişdilər. Lakin bəyanatdan iki gün sonra “Real”, “Barselona” və “Yuventus”dan başqa digər klublar yeni turnirin təşkilindən imtina etmişdilər. UEFA isə həmin klubları sərt cəzalandıracağına dəfələrlə işarə vurmuşdu...
