"ASK Arena"da şəhid İsrayıl Cəfərzadənin xatirəsinə həsr olunmuş dostluq görüşü keçirilib.

"Football-plus.az" saytının məlumatına görə, 27 Sentyabr - Anım Günü ilə bağlı klubun U-17 və U-19 komandaları arasında görüş təşkil olunub.

Oyundan öncə Azərbaycan Respublikasının ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Xatırladaq ki, 30 sentyabr 2000-ci ildə Bakı şəhəri Sabunçu rayonunda anadan olmuş İsrayıl Cəfərzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində Füzulinin və Suqovuşanın azadlığı uğrunda gedən döyüşlərdə vuruşub. 16 oktyabr 2020-ci ildə Tərtər rayonunun Suqovuşan qəsəbəsi istiqamətində gedən döyüşlərdə döyüş tapşırığını yerinə yetirərkən şəhid olub. İsrayıl Bakıxanov qəsəbəsində yerləşən Şəhidlər Xiyabanında torpağa tapşırılıb.

Azərbaycan Prezidenti İlham Əliyevin 15.12.2020-ci il tarixli Sərəncamına əsasən İsrayıl Cəfərzadə ölümündən sonra “Vətən uğrunda”, 24.06.2021-ci il tarixli Sərəncamına əsasən isə “İgidliyə görə” medalları ilə təltif edilib.

Oyundan sonra keçirilən görüş iştirakçılarının mükafatlandırma mərasimində "Keşlə"nin İdarə Heyətinin sədr müavini Elşan Abasov klubun sadiq azarkeşi olmuş İsrayıl Cəfərzadənin əziz xatirəsinin ehtiramla yad olunduğunu və qəhrəman övlad böyütdüklərinə görə şəhidin valideynlərinə minnatdarlığını bildirib.

Şəhidin atası Namiq Cəfərzadə övladının xatirəsinə göstərilən ehtirama görə "Keşlə"nin rəhbərliyinə və dostluq görüşündə iştirak edən komanda üzvlərinə təşəkkürünü bildirib.

Sonda "Keşlə"nin məşqçi heyəti və üzvləri hər iki komandanın üzvlərinə fəxri diplom təqdim ediblər.