Deyəsən, Mario Balotelli qısa müddət ərzində ''Adana Dəmirspor'' fanatlarının sevimlisinə çevrilməyi bacarıb.

Bilindiyi kimi, ötən həftəiçi onun ''Beşiktaş''la səfər oyununda vurduğu qoldan sonra Sərgən Yalçına göstərdiyi beyin hərəkəti gündəmi zəbt etmişdi. Dünən Adana təmsilçisi 7-ci tur çərçivəsində öz meydanında ''Qaziantep''i qəbul etdi. Yerli fanatların tribunada Balotellinin həmin o beyin hərəkətinin böyük rəsmini açması diqqət çəkdi! Onlar bununla da ünlü futbolçunun arxasında olduğunu göstərdilər. Balotelli də bu dəstəyə layiqli qarşılıq verərək 4:0-lıq qələbədə 1 qol vurdu və 81-ci dəqiqədə böyük alqışlarla meydanı tərk etdi.

Qeyd edək ki, bu mövsüm artıq Balotellinin hesabında 3 qol, 2 məhsuldar ötürmə var və o, ''qol+ötürmə'' göstəricisi üzrə komandasının ən yaxşısıdı. ''Adana Dəmirspor''un son 3 oyunda 7 xal toplaması və 10 qol vurması diqqət çəkir.