“Cəbrayıl”ın Region Liqasında iştirakı dəqiqləşdi - RƏSMİ AÇIQLAMA
“Həm “Cəbrayıl”, həm də “Xan Lənkəran” Region Liqasında çıxış etmək üçün bizə rəsmi müraciət edib”.
Bu sözləri “Football-plus.az” saytına açıqlamasında Yusif Vəliyev deyib. AFFA-nın Uşaq və Gənclər üzrə Yarışların Təşkili Şöbəsinin müdiri Region Liqasında iştirak edəcək klubların konkret sayını oktyabrın 1-dən sonra açıqlaya biləcəyini bildirib:
“Ümumiyyətlə, yarışda iştirak etmək üçün bizə müraciət edən bütün klublarla bağlı məsələ dəyərləndirmə mərhələsindədi. Komandaları müraciətlərinə əsasən ardıcıl olaraq görüşə dəvət edirik. Söhbət təbii ki, yeni klublardan gedir. Həmin komandalarla görüşüb, təminat məktubu və digər məsələləri müzakirə edirik. Sonda isə Region Liqasının İşçi qrupu tərəfindən yekun nəticə açıqlanır. Onu deyə bilərəm ki, artıq “Xan Lənkəran” və “Cəbrayıl” klubları müraciət ediblər. Lənkəranlıların işi dəyərləndirmə mərhələsindədi. Böyük ehtimalla bir neçə gün ərzində onlarla görüşümüz olacaq. Eyni proses “Cəbrayıl”la bağlıdı. Artıq onların nümayəndələri ilə görüşlər keçirilib. Deyə bilərik ki, “Cəbrayıl” Region Liqasında iştirak edəcək. Ümumi sayla bağlı isə heç nə söyləyə bilməyəcəm. Bu haqda dəqiq məlumatı oktyabrın 1-dən sonra ictimaiyyətə açıqlaya bilərəm”.
İLKİN SULTANLI
