Kriştiano Ronaldo avqustun son günlərində “Yuventus”u “Mançester Yunayted”ə dəyişməklə sabiq klubuna hörmətsizlik edib.

Bu fikri Jorje Mendeş haqda da söyləmək olar. Ulduz futbolçunun agenti bu yay müştərisinin iş yerini dəyişmək istəyini “Yuventus”a bildirib. İtaliya klubu Mendeşə “transfer istəyirsinizsə, danışıqlara hazırıq. Lakin keçid istənilən halda avqustun 15-dək rəsmiləşməlidi” cavabını verib. “Yuventus” rəhbərliyi ötən ayın 15-dən sonra komandanın aparıcı hücumçusuna layiqli xələf tapmağın çətin olacağına işarə vurub. Bu səbəbdən şifahi razılaşmada Mendeşə müştərisi üçün yeni iş yerini avqustun 15-nə qədər tapmalı olduğu bildirilib.

Turin klubu həmin tarixə qədər məşhur agentin Kriştianonun gələcəyi ilə bağlı hər hansı açıqlama verməməsini futbolçunun yeni mövsümə də ağ-qara formada başlayacağı kimi anlayıb. Rəhbərlik və baş məşqçi Massimiliano Alleqri bununla bağlı rəqmi açıqalamalar vermişdi. Lakin Ronaldo və meneceri şifahi razılaşmaya məhəl qoymayıblar. 36 yaşlı portuqaliyalı futbolçunun MY-yə keçidi rəsmən avqustun 27-də bəyan edilmişdi. Bu səbəbdən hücum xətti ilə bağlı ehtiyat variantı olmayan və ciddi narahatlıq keçirən “Yuventus” rəhbərliyi “transfer pəncərəsi”nin bağlanmasına bir neçə gün qalmış tələm-tələsik 21 yaşlı Moyze Keni “Everton”dan icarəyə götürməli olub.