İspaniyanın Madrid şəhərinin 17 saylı məhkəməsindən UEFA-ya ultimatum verilib.

Hakim Manuel Ruis de Lara qurumun prezidenti Aleksander Çeferindən Avropa Superliqasının təsisçiləri olan klublara qarşı sanksiyalarla bağlı qərarların ləğvini istəyib.

UEFA-ya bunun üçün 5 günlük möhlət verilib. “Marka” qəzetinin xəbərinə görə, məhkəmə qitə futbol təşkilatından “Real”, “Barselona” və “Yuventus”a qarşı nəzərdə tutulan bütün sanksiyaların ləğvini tələb edib. Məhkəmənin qətnaməsində “UEFA-nın bu klublarla bağlı sanksiyaların ləğvi istiqamətində hər hansı addım atdığını sübut etmədiyi” vurğulanıb. Beləliklə, futbol qurumu yaxın günlərdə rəsmi saytı vasitəsilə məhkəmədən xəbərdarlıq aldığını göstərən məlumatı dərc etməlidi. Əks halda prezident Çeferin itaətsizliklə bağlı maddə üzrə cinayət məsuliyyətinə cəlb oluna bilər.

UEFA bir müddət əvvəl Avropa Superliqasının təşkili ilə bağlı məhkəməni uduzmuşdu. Futbol qurumu bu səbəbdən təsisçi klublara qarşı sanksiyaları ləğv etməyə borclu idi. Məhkəmə 3 klubla bağlı intizam işinə son qoyulmasına, həmçinin böyük təzyiq qarşısında qalaraq Superliqa ideyasından geri çəkilən digər 9 kluba tətbiq edilən cərimə və məhdudiyyətlərinin ləğvinə qərar vermişdi. Qərarda həmçinin məlum işə Avropa İttifaqının Lüksemburqakı məhkəməsinin də baxacağı qeyd edilmişdi. Beləliklə, UEFA-nın Avropa futbolunda inhisarçı mövqeyi qəti şəkildə pislənmişdi.

Onu da xatırladaq ki, aprelin 18-də “Mançester Yunayted”, “Mançester Siti”, “Arsenal”, “Liverpul”, “Tottenhem”, “Çelsi” (hamısı İngiltərə), “Real”, “Barselona”, “Atletiko” (hamısı İspaniya), “Yuventus”, “Milan” və “İnter” (hamısı İtaliya) klubları Avropa Superliqasını yaratdıqlarını bəyan etmişdilər. Lakin bəyanatdan iki gün sonra “Real”, “Barselona” və “Yuventus”dan başqa digər klublar yeni turnirin təşkilindən imtina etmişdilər.