Mövsümə bərbad başlayan ''Lill'' fanatlarını üzməkdə davam edir.

"Football-plus.az" saytıbın məlumatına görə, "itlər" dünən Liqa-1-in 6-cı turu çərçivəsində ''Lans''ın qonağı olublar. Şimal derbisi sayılan bu görüşə fanatların hərəkətləri damğa vurdu. ''Lill'' fanatlarının qarşı tərəfə yad əşyalar atması ilə başlayan olaylar ''Lans'' fanatlarının meydana axın etməsi və oyunun bir müddət dayandırılması ilə nəticələndi. Polislər gözyaşardıcı qazdan istifadə edərək onları çətinliklə yerlərinə qaytara bildilər. Bu olaylar üzündən ikinci hissə 25 dəqiqə gec başladı. Bu gərgin derbidə sevinən meydan sahibləri oldu. Frankovskinin 74-cü dəqiqədə vurduğu qol ''Lans''a qələbə qazandırdı. ''Lill''in türkiyəli oyunçularından Burak Yılmazla Zəki Çəlik 90 dəqiqə meydanda qaldısa, Yusuf Yazıcı 78-ci dəqiqədən oyuna qoşuldu. 6-cı oyunda 3-cü dəfə məğlubiyyət acısı yaşayan son çempionun aktivində cəmi 5 xal var.

Onu da bildirək ki, bu mövsüm Fransa çempionatında artıq 3-cü dəfə azarkeşlər matçın dayanmasına səbəb oldular. 1-ci turda oynanılan ''Monpelye'' - ''Marsel'' matçının son anlarında azarkeşlərin meydana yad cisimlər atması üzündən oyun təxminən 10 dəqiqəlik dayanmışdı. 3-cü tur çərçivəsindəki ''Nitsa'' - ''Marsel'' qarşılaşması isə yerli fanatlarla qonaq futbolçular arasında yaşanan iğtişaş üzündən yarımçıq dayandırılmışdı.