“Qarabağ” avrokuboklardakı məğlubiyyətsizlik seriyasını 7 oyuna çatdırıb.

"Football-plus.az" saytının məlumatına görə, ağdamlılar cari mövsümdə heç kimə uduzmayıb. Onlar təsnifat mərhələlərində İsrail “Aşdod”u (0:0, 1:0), Cənubi Kipr AEL-i (1:1, 1:0) və Şotlandiya “Aberdin”ini (1:0, 3:1) məğlubiyyətsiz keçib və qrup mərhələsinə “Bazel”lə qolsuz “sülh”lə başlayıb. “Qarabağ” axırıncı dəfə ötən mövsümdə Avropa Liqasının qrupundakı son görüşdə uduzub. Həmin vaxt təmsilçimiz “Vilyarreal”dan texniki məğlubiyyət alıb.

Son 7 qarşılaşmada reytinqə xallar qazandıran ağdamlılar bununla da Azərbaycan futbol tarixinin rekordunu təkrarlayıb. Belə ki, Avropada ardıcıl 7 matçda uduzmamaq klublarımızın 27 illik qitə səhnəsində rekorddu. İndiyədək belə seriya 3 dəfə qeydə alınıb. 2009-10-cu illərdə “Qarabağ” ardıcıl 7 matçda uduzmayıb. 2010-13-cü illərdə “İnter” (indiki “Keşlə”) bu rekordu təkrarlayıb. 2011-13-cü illərdə “Qarabağ” özünün ikinci, Azərbaycanın üçüncü belə seriyasına imza atıb. Hər üç seriya bir yox, bir neçə mövsümü əhatə edib. Ağdamlıların indiki seriyası isə bir mövsümdə qeydə alınıb.
İndiyədək bir mövsümdə ardıcıl 7 matçda uduzmayan komandamız olmamışdısa, ağdamlılar ilki reallaşdırıb. Həm də yeni yaradılan turnirdə. “Qarabağ” həm mövsümə, həm də hər hansı qitə kubokuna ardıcıl 7 məğlubiyyətsiz matçla başlayan ilk komandamızdı.