Türkiyə yığmasının yeni baş məşqçisi ilə bağlı qeyri-müəyyənlik davam edir.

Bilindiyi kimi federasiya son günlərdə Ştefan Kuntsla danışıqlar aparır. 2016-dan bu yana Almaniyanın gənclər yığmasını çalışdıran Kunts bir neçə gün öncə İstanbula gələrək Türkiyə Futbol Federasiyası (TFF) ilə görüş keçirmişdi. Hələ ki, tərəflər arasında anlaşma əldə olunmayıb. Almaniyanın ünlü ''Bild'' nəşri bu məsələ ilə bağlı yeni detalları açıqlayıb. Məlum olub ki, Kunts Türkiyənin başına keçməsi üçün ailəsinin qərarını gözləyir. Xüsusilə həyat yoldaşı Sabin Kuntsun fikirlərinin onun üçün böyük önəm daşıdığı qeyd olunur. Bundan başqa ''Bild''də yer alan daha bir maraqlı məqam odu ki, Kuntsun Türkiyənin başına keçəcəyi ilə bağlı xəbərlərə baxmayaraq o, ölkəsinin gənclər yığmasındakı işini davam etdirir. Almaniya Futbol İttifaqının (AFİ) heç bir rəsmisi onunla müqavilənin mümkün ləğvi ilə bağlı danışıqlar aparmayıb. 59 yaşlı mütəxəssisin AFİ ilə 2023-cü ilə qədər müqaviləsi var.

Almaniyanın digər nəşri ''Kikker'' isə TFF-nin B planının açıqlayıb. Belə ki, həmin nəşrin yazdığına görə Kuntsla anlaşa bilməyəcəyi təqdirdə federasiya Andrey Şevçenkoya təklif irəli sürəcək. Ukrayna yığmasını son AÇ-nin ¼ finalına yüksəldən və turnirin ardından istefa verən 44 yaşlı mütəxəssis hazırda işsizdi.