Qarşıdakı iki həftə Ronald Kuman üçün heç də asan keçməyəcək. O, komandasının nəticələrini yaxşılaşdırmalıdı.

Əks halda “Barselona”dakı işini itirəcək. Xuan Laportanın baş məşqçi ilə srağagünkü görüşünün növbəti detalları açıqlanıb. “Deportes Cuatro” nəşrinə inansaq, klubun prezidenti Çempionlar Liqasının ev oyununda “Bavariya”ya 0:3 hesablı məğlubiyyətdən sonrakı görüş zamanı niderlandlı mütəxəssisi istefaya göndərməsə də, ona ultimatum verib. Belə ki, Laporta Kumana komandanın nəticələrini yaxşıya doğru dəyişməsi üçün 4 oyunluq şans verib. 

“Barselona” qarşıda La Liqada “Qranada”, “Kadis”, “Levante”, Çempionlar Liqasında isə “Benfika” ilə matçlara çıxacaq. Kumanın komandası bu oyunlarda müsbət nəticələrə nail ola bilməsə, Laporta baş məşqçini istefaya göndərəcək. “Deportes Cuatro”nun yazdığına görə, prezident komandanın öz üslubuna uyğun oynamasını, baş məşqçinin üç mərkəz müdafiəçili sistemdən imtinasını və gənc oyunçulara daha çox şans verməsini istəyir.