''Qalatasaray'' Falkaoya nə qədər təzminat ödəyib?
''Qalatasaray'' prezidenti Burak Elmas komandanın bu yay reallaşdırdığı transferlərdən danışıb və bəzi maraq doğuran rəqəmləri açıqlayıb.
O, ''Cim-Bom''dan ayrılan Radamel Falkaoya ödənilən təzminatı da gizlətməyib: ''Biz birmövsümlük komanda qurmamışıq. ''Qalatasaray''ın gələcəyini inşa etmişik. Baş məşqçimizlə bir-birimizi anlayaraq və böyük cəsarət göstərərək qarşıdakı 4-5 ildə adından söz etdirəcək oyunçular almışıq. Klub tarixində bəlkə də ilk dəfə belə bir transfer dönəmi yaşandı. Ötən mövsüm büdcəmiz 61,5 milyon avro idisə, bu dəfə büdcəni 48,2 milyon avroya qədər endirmişik. İcarəyə oyunçu götürmədiyimiz və uzunmüddətli müqavilələr imzaladığımız üçün bu heyətlə büdcə 30-35 milyon avroya qədər düşşəcək. Fatih Terimlə də uzun müddət çalışmaq niyyətindəyik. Yəni ''Qalatasaray''da qurduğumuz sistem qarşıdakı illərdə çox yaxşı işləyəcək. Falkaonun bu mövsüm üçün bizdən alacağı məvacib 6,5 milyon avroya bərabər idi. Bundan başqa, oynadığı hər 5 oyuna görə də müqaviləsində bonus nəzərdə tutulmuşdu. Ona yarıbayarı təzminat, yəni 3 milyon avro ödəyərək yollarımızı ayırdıq. Cimmi Durmaza isə 200 min avro təzminat verdik''.
Falkaodan söz düşmüşkən, bir maraqlı xəbəri də diqqətinizə çatdıraq. Bilindiyi kimi, ünlü kolumbiyalı forvard ''Rayo Valyekano'' ilə ikiillik müqavilə bağlayıb. 35 yaşlı forvardın nömrə seçimi isə futbolsevərləri təəccübləndirib. ''Marka'' nəşrinin yazdığına inansaq, Falkao yeni klubunda ''3'' nömrəli forma ilə çıxış edəcək. Onun adətən müdafiəçilərin seçdiyi nömrəyə üstünlük verməsinin səbəbi bəlli deyil.
