“Bursaspor”u rahatladan Azərbaycan türkü
Dünən TFF 1-ci liqanın 5-ci turunda “Bursaspor” “Samsunspor”u 4:1 hesabı ilə məğlub edib.
“Football-plus.az” saytının məlumatına görə, qarşılaşmada millimizin üzvü Namik Ələskərov 2 məhsuldar ötürmə ilə yadda qalıb. 61-ci dəqiqə oyuna qoşulan yarımmüdafiəçinin performansı “timsahlar”ın azarkeşlərinin diqqətini cəlb edib. “Bursasporluyuz.org” platformasında “Namik Ələskərov məst etdi” başlıqlı yazı gedib. Məqalənin şərh bölməsində bursalı azarkeşlər azərbaycanlı futbolçuya təriflər yağdırıblar.
Həmin platformada “Ohh bə” başlıqlı digər yazıda müəllif bir paraqrafda Namik Ələskərovdan bəhs edib. Onun fikirlərini diqqətinizə çatdırırıq:
“Əmirxan ikinci sarı vərəqə alaraq oyunu tərk edəndən sonra “Bursaspor”u rahatladan şəxs Azərbaycan türkü Namik Ələskərov oldu. Ötən həftə üzünə baxılmayan yarımmüdafiəçi əvvəlcə Batuhanın, sonra da Kərəm Şənin qol vurmasına şərait yaradaraq qələbənin memarlarından oldu”.
İLKİN SULTANLI
