''Beşiktaş'' dünən Çempionlar Liqasının qrup mərhələsinin 1-ci oyununda öz meydanında Dortmund ''Borussiya''sına 1:2 hesabı ilə məğlub oldu.

''Qartal''ın doğma ''Vodafon Park''da Almaniya klublarına qarşı maraqlı statistikası var. ''Ağ-qaralar'' bu stadionda 8-ci dəfə ÇL matçı keçirdilər. Bu 8 oyunda ''Beşiktaş''ı ancaq bundesliqa təmsilçiləri yenməyi bacarıb. ''Borussiya''dan öncə ''Beşiktaş'' 2017/18-in 1/8 finalında öz meydanında ''Bavariya''ya da uduzmuşdu. Amma digər tərəfdən istanbullular yeganə qələbələrini də məhz Almaniya təmsilçisi ilə görüşdə əldə ediblər. Elə həmin 2017/18-də ''Beşiktaş'' qrup mərhələsində ''Leyptsiq''ə qalib gəlmişdi. ''Qartal'' doğma məbədində keçirdiyi digər 5 ÇL oyununda Kiyev ''Dinamo''su, ''Napoli'', ''Benfika'', ''Monako'' və ''Portu'' ilə bərabərə qalıb. Onu da bildirək ki, Sərgən Yalçının komandası dünənki oyunda ümumilikdə 114,7 km məsafə qət edib. Bu, son 8 mövsümdə ÇL-də Türkiyə klublarının ən yaxşı göstəricisidi. Bundan daha yaxşı göstərici sonuncu dəfə 2013/14-də ''Qalatasaray''da olub. O vaxt Roberto Mançininin çalışdırdığı komanda ''Kopenhagen''lə səfər oyununda 117 km məsafə qət etmişdi.