“Mersedes” Bottası Rassell ilə əvəzlədi
Son günlərdə “Formula-1” dünyasında olduqca hərəkətli anlar yaşanır, keçidlər sıralanır.
“Mersedes”in pilotu Valtteri Bottas yeni mövsümdən “Alfa Romeo”nun şərəfini qoruyacaq. O, bu komanda ilə uzunmüddətli müqavilə imzalayıb. Fin pilot “Alfa Romeo”da cari mövsümün ardından karyerasını bitirəcəyini elan edən həmvətəni Kimi Raykkoneni əvəz edəcək. Bottas İsveçrə komandası ilə bağladığı müqaviləni belə şərh edib:
“Karyeramda yeni səhifə açılır"
“Alfa Romeo”ya qoşulacağıma görə sevinirəm. “Alfa Romeo” təqdimata ehtiyac duymayan brenddi, bu markanı təmsil etmək mənim üçün şərəf olacaq. Mənə göstərdiyi etimada görə komandaya təşəkkür edirəm. Özümdə böyük yüngüllük duyuram. Hər şey aydınlaşdı və yaxın 3,5 ildə nə ilə məşğul olacağımı bilirəm. Çiynimdən yük götürüldü, artıq işə köklənə bilərəm. Müqaviləmin müddəti çox şeydən asılıdı, ancaq düşünürəm ki, ən azı 3 ili yeni komandamda keçirəcəm. Çoxillik müqavilə mənim üçün çox vacibdi. Faktiki bütün karyeram boyunca hər mövsüm müqaviləmi yeniləmişəm. Uzunmüddətli planlar qurmaq imkanı gözəldi”.
“Mersedes”in ünlü pilotu Lüis Hemilton da tərəfdaşının ayrılıq xəbərinə reaksiya verib:
“Son 5 ildə Bottasla birgə çalışdığıma görə hədsiz qürur içindəyəm. Biz birlikdə ardıcıl 4 dəfə Mühəndislər kubokunu qazanan komandanın bir hissəsi olduq. Eniş-yoxuş olanda bir-birimizə motivasiya verirdik. İndiyə qədər çalışdığım tərəfdaşlardan ən yaxşısısan. Valtteri, sənin sürətin və möhkəmliyin həmişə adamı heyran edirdi, ancaq mənə təsir edən ən böyük cəhətin həmişə insanlığı qorumağındı. Gələcək karyeranda sənə hər şeyin ən yaxşısını arzulayıram. İndi isə əməkdaşlığı yüksək nəticə ilə bitirək və komandaya 8-ci titulu qazandıraq”.
“Mersedes”in rəhbəri Toto Volff da Bottasa uğur arzulayıb:
“Bu qərarı qəbul etmək asan deyildi. Valtteri bu 5 mövsümdə əla çalışdı, komandanın inkişafına, uğurlarımıza vacib töhfələr verdi. Hemiltonla birgə tərəfdaşlıq münasibətlərinə dair etalon müəyyənləşdirdi ki, bu da titullar uğrunda mübarizədə önəmli rol oynadı. Əlbəttə, Valtteri komandada qalmaq imkanını haqq edirdi. “Alfa Romeo”ya keçmək çağırığını qəbul etdiyinə görə də sevinirəm. Vaxt-vədə gələndə komandamızı tərk edəcək, ancaq o həmişə “Mersedes” ailəsinin bir hissəsi kimi qalacaq”.
Artıq “Mersedes”də Bottası kimin əvəz edəcəyi də məlumdu. “Uilyams”ın pilotu Corc Rassell yeni mövsümdən Almaniya komandasının uğurları üçün çalışacaq. 23 yaşlı britaniyalı da uzunmüddətli müqavilə bağlayıb və yeddiqat dünya çempionu Hemiltonun yeni tərəfdaşı olacaq.
Bəs Rasselli “Uilyams”da kim əvəz edəcək? Bu sualın cavabını da çox gözləmək lazım gəlməyib. “Red Bull”un ehtiyat pilotu Aleks Albon “Uilyams”ı uğurlara daşımağa çalışacaq. Aleks 2020 mövsümündə “Red Bull”un əsas pilotu kimi çıxış edib və şəxsi hesabda 7-cu yeri tutub.
“Formula-1” dünyasından başqa maraqlı xəbərlər də gəlir. Pyer Qasli və Yuki Sunoda “Alfa Tauri” ilə müqavilənin müddətini 2022 mövsümünün sonuna qədər uzadıb. Qasli 2017-dən bu komandanın şərəfini qoruyursa, Sunoda bu il onun tərəfdaşı olub.
Daha bir maraqlı xəbər Ferstappen ailəsi ilə bağlıdı. Sabiq “Formula-1” pilotu Yos Ferstappen oğlu Maksın Niderland “Qran-pri”sindəki tarixi qələbəsini tribunadan izləyə bilməyib. 49 yaşlı ata Ferstappen şənbə günü televizor önündə əyləşibsə, bazar günü qarnındakı ağrılar üzündən xəstəxanaya yollanmalı olub. Kompleks müalicə tədbirləri ilə qarşılaşan Yosa antibiotiklər yazıblar. Niderlandın “Formula-1” yarışlarında podiuma qalxan ilk təmsilçisinin həyatı və sağlamlığı ilə bağlı təhlükə yoxdu.
Təbii ki, həftəsonu keçiriləcək İtaliya “Qran-pri”si Maks Ferstappen – Lüis Hemilton rəqabətinin davamı baxımından böyük maraq doğurur. Britaniyalı rəqibini cəmi 3 xal qabaqlayan niderlandlı pilot Montsa mərhələsi ilə bağlı gözləntilərini bölüşüb:
“Əlbəttə, əvvəlki mövsümlərlə müqayisədə rəqabətədavamlı olmalı və Montsada daha yaxşı görünməliyik. Ancaq “Mersedes”lə mübarizə aparmaq üçün bunun kifayət edəcəyinə əmin deyiləm. Sadəcə, ümid edirəm ki, yaxşı hazırlaşa, işimizin öhdəsindən gələ bilərik. Hələ ki qüvvələr nisbətinin necə olduğu haqda danışmaq çətindi”.
