İlin sonuncu böyük dəbilqə turniri olan ''US Open'' başa çatmaq üzrədi.

Qadınların turnirinə bu gün kanadalı Leyla Fernandes ilə britaniyalı Emma Radukanu arasındakı final oyunu ilə yekun vurulacaq. Dünən kişilərin turnirində də finalçılar məlum oldu. Reytinqin 2 nömrəsi Daniil Medvedev gözlənildiyi kimi kanadalı Feliks Oje-Alyasimlə görüşdə ciddi problem yaşamayaraq 3 setdə qalib gəldi. Rusiyalı tennisçi bu il ikinci, karyerasında üçüncü dəfə böyük dəbilqənin finalına yüksəldi. Digər yarımfinalda Novak Cokoviçlə Aleksander Zverev qarşılaşdı. Rusiyaəsilli almaniyalı Zverev bir ay öncə Olimpiyadanın yarımfinalında sürpriz şəkildə serbiyalı əfsanəni yenməyi bacarmışdı. Bu dəfə 3 saat 38 dəqiqə davam edən görüşdə Cokoviç 4:6, 6:2, 6:4, 4:6, 6:2 hesablarıyla 5 setdə qalib gələrək rəqibindən qisas almağı bacardı. Beləliklə, bu ilin ilk 3 böyük dəbilqə turnirində qalib gələn 34 yaşlı tennisçi ABŞ-da da finala yüksəldi. O şəxsi oyunlarda 5:3 hesabı ilə üstələdiyi Medvedevi də finalda yenəcəyi təqdirdə tennis tarixində birdən-birə iki mühüm göstəriciyə nail olacaq. Birincisi, Novak 21-ci dəfə böyük dəbilqəni qazanaraq Rafael Nadalla Roje Federeri üstələyəcək və bu göstəricidə vahid liderliyə yüksələcək. İkincisi, Cokoviç 52 ildən sonra bir ildə 4 böyük dəbilqənin hamısını qazanan ilk tennisçi olacaq! Sonuncu dəfə bunu 1969-da avstraliyalı əfsanə Rod Leyver bacarıb.

Sonda qeyd edək ki, final oyunu sabah Bakı vaxtı ilə saat 00.00-da başlayacaq.