Aqil Nəbiyev “milliləşdirmə”yə qarşıdı - AÇIQLAMA
17 yaşadək futbolçulardan ibarət yığma Bakıda təlim-məşq toplanışını başa vurub.
Yığma hazırlıq çərçivəsində iki yoldaşlıq oyunu keçirib. Sentyabrın 3-ü və 6-da Türkiyənin müvafiq yaş qrupundan ibarət komandası ilə qarşılaşan U-17 1:4 və 0:2 hesabı ilə məğlub olub.
Həm bu oyunlar, həm də yığmanın hazırkı vəziyyəti və gələcək planları ilə bağlı komandanın baş məşqçisi Aqil Nəbiyevlə danışdıq:
“Avqustun 31-dən Bakıda toplanışa yığışdıq. Sentyabrın 3-də Mərdəkanda ilk oyunumuzu Türkiyəyə qarşı keçirdik. Təbii ki, keyfiyyətli rəqibdi. Çünki özümüz belə komanda ilə qarşılaşmaq istədik. Oktyabrda qarşılaşacağımız Belçika, Norveç, Lüksemburq Türkiyə yığması ilə eyni səviyyədədi. Ona görə belə rəqib seçdik ki, ən azı uşaqların bacarığını, çatışmayan tərəflərini görək. Təbii ki, rəqibin heyəti haqda məlumatımız var idi. Türkiyə superliqasında, Almaniya bundesliqasında və Hollandiyada çıxış edən futbolçular var. İlk matçın hesabı oyuna görə olmadı. Əslində heç-heçə bitməliydi. Sonradan fiziki durum istənilən səviyyədə olmadığı üçün oyunçular yorulurdular. Çünki bilirsiz ki, 2 ilə yaxındı bizdə aşağı yaş qrupu üzrə çempionatlar keçirilmir. Uşaqların fiziki durumu o səviyyədə olmadığı üçün 65-70-ci dəqiqədən sonra 3 top buraxdıq. Amma təbii ki, pozitiv tərəflərimiz də var idi. Bəzi şeyler bizi qane edirdi. Belçika səfərinə qədər səhvləri aradan qaldırmağa çalişacağıq... Sentyabrın 6-da Bakı Olimpiya Stadionunun yardımcı meydanında ikinci oyunumuzu keçirdik. Havanın küləkli olması hər iki komandaya mənfi təsir etdi. İstədiyimiz oyunu nümayiş etdirə bilmədik. Amma dediyim kimi, rəqibin güclü olması həm futbolçular, həm də biz məşqçilər üçün böyük təcrübə oldu. Çünki görmədiyimiz bəzi məqamları gördük”.
Nəbiyev heyətlə bağlı bunları söylədi:
“Xaricdən dəvət etdiyimiz 2 futbolçu var ki, ikisi də əslən azərbaycanlıdı. Onlar Rusiyanın aşağı liqalarında mübarizə aparan klublarin akademiyasında oynayırlar. U-17-də əcnəbi futbolçu yoxdu. Əcnəbini gətirib “milliləşdirmək” fikrində deyilik. Biz ancaq xaricdə yaşayan azərbaycanlılarla maraqlanırıq. Məsələn, bəzi futbolçuları dəvət etdik. Amma onlar Azərbaycana gəlmədilər. Gürcüstandan, Krasnodardan, Kazandan azərbaycanlı uşaqlar var idi. Ora vətəndaşı olduqları üçün dəvətimizi qəbul etmədilər. Avropa çemionatına getməyə bir aydan da az vaxtımız qalıb. Bu üzdən elə bir niyyətimiz yoxdu ki, hansısa əcnəbi futbolçunu gətirib “milliləşdirək”. Lakin ölkə xaricində yaşayan azərbaycanlı varsa, sevə-sevə onu komandamıza dəvət edərik”.
SƏNƏM FƏRHADOVA
