Ardıcıl 2-ci dəfədi mövsümə 3 məğlubiyyətlə başlayan və Entso Krivellini ''Antalyaspor''a icarəyə verən ''İstanbul BŞ'' heyətinə yeni hücumçu cəlb edib.

Başakşəhərlilər ''Udineze''dən Stefano Okaka Çukanı transfer ediblər. 32 yaşlı təcrübəli italiyalı forvardla ikiillik müqavilə imzalanıb. Daha öncə ''Roma'', ''Breşiya'', ''Fulhem'', ''Bari'', ''Spetsiya'', ''Anderlext'', ''Sampdoriya'', ''Uotford'' kimi klublarda top qovmuş Okaka 2018/19-un qış fasiləsində 5 milyon avroya ''Udineze''yə transfer olunmuşdu. 186 sm boya malik futbolçu ötən mövsüm Udine klubunda 23 oyunda 4 qol, 1 məhsuldar ötürmə ilə yadda qalıb. İtaliya yığmasında 5 oyun keçirən və 1 qol vuran Okaka İstanbul klubunda ''77'' nömrəli formanı geyəcək.

Bu arada başakşəhərlilərin bütün cəhdlərinə baxmayaraq Xames Rodrigesi transfer etmək mümkün olmayıb. ''İstanbul BŞ'' ''Everton''la anlaşaraq ünlü kolumbiyalı yarımmüdafiəçinin illik maaşının 25 faizini ödəmək öhdəliyini üzərinə götürmüşdü. Amma ''Real'' və ''Bavariya''nın sabiq futbolçusu Türkiyəyə gəlməkdən imtina edib.