Kuman Pyaniçin ittihamlarına cavab verdi
''Barselona''nın baş məşqçisi Ronald Kuman Miraləm Pyaniçin sözlərinə cavab verib.
Xatırladaq ki, bu günlərdə Kataloniya nəhəngini tərk edərək icarə əsasında ''Beşiktaş''a keçən bosniyalı yarımmüdafiəçi ''Marka'' nəşrinə verdiyi geniş müsahibədə ötən mövsüm Kumanın onunla bir dəfə olsun normal söhbət etmədiyini deyərək niderlandlının çox qəribə bir məşqçi olduğunu iddia etmişdi.
58 yaşlı mütəxəssis İspaniya mətbuatına bunları deyib:''Belə görürəm ki, Pyaniçin burda yaşadıqları onun üçün böyük üzüntü olub. Bizim oyun tərzimiz, eləcə də toplu və topsuz oyun strategiyamız baxımından Pyaniç öz mövqeyindəki rəqabətdə digər oyunçulara uduzdu. Yoxsa onun oynadılmamasının başqa səbəbi yoxdu. Ötən mövsümün gedişində qarışıq durumlar yaranmışdı. Bununla belə Pyaniçi dəfələrlə sınadıq. Amma bizə ondan daha çox fayda verən başqa oyunçuların olduğunu gördük. Bundan sonra Pyaniç haqda danışmaq istəmirəm. Bu mövzu mənim üçün bağlandı. Pyaniç artıq ''Barselona''nın oyunçusu deyil və hər kəsin fikrinə hörmətlə yanaşıram. Pyaniç ilə işim bitdi''.
