''Fənərbaxça''da Canər Ərkinin ikinci dönəmi rəsmən başa çatdı.

Təcrübəli futbolçu ''Çaykur Rizəspor''la danışıqlar aparırdı və onun məhz bu kluba, uzun illərdi birlikdə top qovduğu Gökhan Gönülün yanına yollanacağı gözlənilirdi. Hətta Canər əşyalarını toplayaraq Rizəyə yollanmaq üzrə idi. Amma bu klubla onun meneceri arasında maddi şərtlərdə heç cür anlaşma əldə etmək mümkün olmadı. Bu hadisədən bir müddət sonra araya superliqanın digər təmsilçisi ''Fatih Karagümrük'' girdi. İstanbul klubu qısa müddət ərzində Canərin meneceri ilə anlaşınca keçid rəsmən açıqlandı. Beləliklə, ''Fatih Karagümrük''lə birillik müqavilə imzalayan 33 yaşlı futbolçu bu mövsümü də İstanbulda keçirəcək.

Qeyd edək ki, 4 il ''Beşiktaş''da oyandıqdan sonra Ərkin ötən yay ikinci dəfə ''Fənər''ə keçmişdi. O daha öncə 2010-16-cı illərdə bu klubda çıxış etmişdi. Təcrübəli futbolçu keçən mövsüm 41 rəsmi oyuna çıxaraq 10 məhsuldar ötürmə ilə yadda qalmışdı. Amma o, yeni baş məşqçi Vitor Pereyranın sisteminə uyğun gəlməyincə bir müddət öncə əsas komandadan kənarlaşdırılmışdı. Ümumilikdə Canər karyerası ərzində keçirdiyi 491 rəsmi oyunda 33 qol vurub və 105 məhsuldar ötürmə verib.