Yusuf Dəmir Avstriyanı təəccübləndirib
Avstriya yığmasının baş məşqçisi Franko Foda bu yay 500 min avro qarşılığında Vyana ''Rapid''indən icarə əsasında ''Barselona''ya keçən Yusuf Dəmir haqda açıqlamalar verib.
"Football-plus.az" saytının məlumatına görə, 18 yaşlı solaxay türkəsilli avstriyalı forvard artıq ''Barsa''nın heyətində laliqada debüt etməyə də macal tapıb. Bununla da o, kataloniyalıların tarixində rəsmi matçda forma geyən 2-ci, son 40 ildə isə bunu bacaran ilk avstriyalı futbolçu olub. Daha öncə bunu 1978-81-ci illərdə Hans Krankl bacarmışdı. Dəmir Avstriya yığmasında isə artıq 2 oyuna çıxıb. 2018-dən bu yana Avstriyanı çalışdıran 55 yaşlı Fodanı dinləyək:
''Yusuf Dəmir hamımızı çox təəccübləndirdi. Avstriyada heç kim onun ''Barsa''nın əsas komandasında oynaya biləcəyinə inanmırdı. Dəmirin mövsümü kataloniyalıların əsas komandasında keçirəcəyi məlum olduqdan sonra Avstriyada böyük bir çılğınlıq başladı. Şübhəsiz Avstriya futbolunun ən parlaq gələcək vəd edən oyunçusu Yusufdu. Əslində ''Rapid''in baş məşqçisi ona çox da güvənmirdi. Bu, Yusuf kimi bir istedad üçün yaxşı hal deyildi. Amma komanda yoldaşlarından çox böyük dəstək gördü. Yusufun Avropa nəhəngləri tərəfindən izlənildiyini bilirdik. Avstriyanın aşağı yaş qruplarından ibarət yığmalarında ona daimi olaraq şans verirdik. Ən azı bu şəkildə inkişafını davam etdirməsinə nail olduq''.
