İslandiya futbolunda böyük qalmaqal baş verib. Bu səbəbdən yerli futbol qurumunun (İFA) rəhbərliyi tam heyətlə istefa verib.

Buna milli komandanın oyunçularından birinin cinsi zorakılıqda ittiham edilməsi səbəb olub. Yaxında 25 yaşlı Torhildur Qida Arnarsdouttir yığmanın oyunçularından birinin 2017-ci ildə ona təcavüz etməyə çalışdığını bildirmişdi. Qız Reykyavikdəki gecə klubunda baş verən hadisəyə görə başqa qadınla birlikdə polisə şikayət etmişdi.

Futbolçunun adı çəkilməsə də, bazar ertəsi “Göteborq”un rəsmi saytı oyunçularından birinin hələ 4 il əvvəlki yolverilməz hərəkətinə görə ittiham olunduğu haqda məlumat yayıb. İsveç klubunda isə bir islandiyalı futbolçu çıxış edir ki, o da Kolbeyn Siqtorssondu.

Arnarsdouttir həm də müxtəlif qadınların futbolçuları seksual təcavüzdə ittiham etmələri ilə bağlı 6 faktı da polislərə çatdırıb. İFA-nın rəhbəri Qudni Berqsson əvvəlcə futbol qurumunun məsələ ilə bağlı şikayət almadığını bəyan etsə də, yerli KİV-də onun istefaya çağırışları səslənəndən sonra zərərçəkənlərdən üzr istəyib. O, əvvəlki şərhinin yanlış olduğunu etiraf edərək İFA-nın tam tərkibdə istefaya yollandığını bəyan edib.