Ötən mövsümboyu Ronald Kumanın “Barselona”da qalıb-qalmayacağı haqda kifayət qədər xəbər yayılmış və ehtimallar irəli sürülmüşdü.

Amma indi onunla bağlı vəziyyət 180 dərəcə dəyişib. İspaniya klubu baş məşqçi ilə müqaviləni yeniləməyi planlaşdırır. “Mundo Deportivo” nəşrinin məlumatına görə, rəhbərlik yeni müqavilənin müzakirəsi üçün niderlandlı mütəxəssis və onun agenti ilə əlaqə saxlayıb.

Qeyd edək ki, “Barselona”nı 2020-ci ildən çalışdıran Kumanın müqaviləsinin müddəti 2022-ci ilin yayına qədər nəzədə tutulub.

Əlavə edək ki, klub Usman Dembele ilə müqavilənin yenilənməsi üzərində də işləyir. “Mundo Deportivo”nun xəbərində rəhbərliyin yay “transfer pəncərəsi” bağlanandan sonra danışıqların sürətlənəcəyinə və Usman ilə azı üçillik müqavilə imzalanacağına ümid etdiyi bildirilir. Tərəflər yeni sözləşmənin müzakirəsi zamanı klubun maliyyə vəziyyətini nəzərə alacaqlar.

24 yaşlı futbolçu da başqa komandaya yollanmaq haqda düşünmür. Dembelenin hazırkı müqaviləsinin müddəti 2022-ci ilin yayına qədərdi. O, “Barselona”ya 2017-ci ildə Dortmund “Borussiya”sından transfer olunub.