Bu gün milli komandamızın atletika idman növü üzrə 3 təmsilçisi finala vəsiqə qazanıb.

100 metrdə Yuliya Yanovskaya, Lamiyə Vəliyeva və Yelena Çebanu finala çıxıblar. Lamiyə bu məsafəni 12.09, Yuliya 12.41, Yelena isə 12.16 saniyə ilə qət edib.

Qadınların 10 metr məsafəyə güllə atma yarışında Yelena Taranova, kişilərdə isə Kamran Zeynalov təsnifat mərhələsində mübarizəni dayandırıblar.

Üzgüçümüz Roman Saleh isə Yay Paralimpiya Oyunlarında 100 m məsafəyə sərbəst üsulla üzməkdə qüvvəsini sınayıb. O, 53.89 saniyə ilə finala vəsiqə qazanıb. İdmançımız həlledici mərhələdə 52,69 saniyə nəticə göstərərək çempion olub. Bununla da özünün ikinci, millimizin 10-cu qızıl medalını qazanıb.

Qeyd edək ki, Roman daha əvvəl 100 m məsafəyə üzgüçülük yarışlarında Paralimpiya çempionu adını qazanıb.