“Qarabağ”ı Şotlandiyada 70 nəfər dəstəkləyəcək” – Gündüz Abbaszadə
Bu gün Konfrans Liqasının pley-off mərhələsinin cavab qarşılaşmasında “Qarabağ” “Aberdin”in qonağı olacaq. Səfərə minimalhesablı qələbə ilə yollanan Ağdam təmsilçisinə qarşı ev sahiblərinin münasibətini öyrənmək üçün klubun mətbuat katibi Gündüz Abbaszadə ilə danışdıq:
“Gəldiyimiz gündən çox yaxşı münasibətlə qarşılaşırıq. Hər şey qaydasındadı. Dünən rahat məşq edə bilməyimiz üçün yüksək səviyyədə şərait yaradılmışdışdı. Həmçinin mətbuat konfransında da gözlədiyimizdən artıq qonaqpərvərlik gördük. Heç bir problem yaşamadıq”.
- Stadionda “Qarabağ”ı dəstəkləyən azərbaycanlılar olacaq? Bununla bağlı kluba məlumat verilib?
- Bəli. Gəldiyimiz gün bizi burda yaşayan azsaylı soyadaşlarımız qarşıladılar. Onlara təşəkkür edirəm. Bildiyim qədər artıq 70-ə yaxın azərbaycanlı “Qarabağ”ı tribunadan dəstəkləyəcəyi ilə bağlı məlumat verib. Bilet alıblar. Bilirsiz ki, pandemiyaya görə tətbiq olunan qaydalara əsasən, yalnız meydan sahiblərinin azarkeşləri stadionda ola bilər. Xüsusi sektor yoxdu. Bu səbəbdən də həmyerlilərimiz “Aberdin” azarkeşlərinin arasında komandaya dəstək verəcəklər. Bu barədə UEFA-ya məlumat vermişik ki, soydaşlılarımızın təhlükəsizliyi təmin olunsun. Bütün tədbirlər görüləcək. Onların eyni yerə bilet aldığı haqda məlumatımız var. Bu sektorda daha çox stüard olacaq ki, həmyerlilərimiz hansısa problem yaşamasınlar.
SƏNƏM FƏRHADOVA
