Konfrans Liqasının "Aberdin"lə cavab qarşılaşmasından öncə "Qarabağ"ın baş məşqçisi Qurban Qurbanovun mətbuat konfransı keçirilib.

Təcrübəli mütəxəssis daha sonra jurnalistlərin suallarını cavablandırıb.

- Azərbaycandakı oyunda "Aberdin"lə bağlı nələri öyrənmisiz?
- Klub haqqında məlumatımız çoxdu. Sadəcə, hər oyunçunun potensialını daha yaxından öyrəndik və daha yaxşı tanıdıq. Çox istəkli komandaya və futbolçulara qarşı oynayacağıq. Mən həmişə düşünmüşəm ki, belə komandalara qarşı oynamağın faydası var. Yaxşı oyun öz yerində, "Aberdin"ə qarşı meydanda yaxşı mübarizə aparmalıyıq. Rəqibin fiziki cəhətdən güclü futbolçuları var. Çox şey demək olar. Bu gün hələ ki, bunlar bəs edər.

- "Aberdin"də hansı oyunçuları təhlükəli hesab edirsiz?
- Hansısa oyunçu haqqında fikir bildirməmişəm. Amma komanda olaraq rəqibin təhlükəli olduğunu bilirəm. Bakıdakı oyundan əvvəl də öz fikirlərimi bildirəndə demişdim ki, onların özlərinə məxsus oyun tərzləri var. Həmin oyun üslubunu da oyunçuların hamısı düzgün yerinə yetirir. Çox bacarıqlı çalışdırıcıları var. Sabahkı oyunda yaxşı oyunçulara və kollektivə qarşı mübarizə aparacağıq. Bunun üçün hazırlaşmışıq.

- Sabahkı matç üçün cəzalı və ya zədəli oyunçularınız var?
- Bəli. Bu barədə məlumat verilib. Patrik Andrade cəza səbəbindən oyunu buraxacaq. Zədəli oyunçularla bağlı həkimlər tərəfindən məlumat veriləcək. Ola bilər ki, bəziləri meydana çıxsın. Patrik Andradenin oynamayacağı isə dəqiqdi.

- Saat fərqini də nəzərə alsaq, Şotlandiyaya səfər sizə nə dərəcədə təsir edəcək?
- Bu barədə qəti düşünmürük. Bunu nəzərə alaraq oyundan iki gün əvvəl gəlmişik. Dünən axşam saatlarından burdayıq. Bütün fikrimiz, düşüncəmiz oyuna tam hazır olmaqdı.

- Daha əvvəl Şotlandiyanın "Seltik" klubu ilə üz-üzə gəlmisiz. Həmin oyundakı təcrübənizdən yararlanacaqsız?
- Məncə, bu oyun çox geridə qalıb. Sadəcə, rəqiblər tam fərqli komandalardı. Bizdə də fərqli heyətdi. Amma son illərdəki təcrübəmizin belə matçlarda faydası olur. Qarşımızdakı rəqib də çox istəklidi, qrup mərhələsinə vəsiqə qazanmaq niyyətindədilər. Təcrübə ilə bərabər meydanda xarakterli oyunçuların olması da önəmlidi.

- İlk oyunda "Aberdin"in futbolçusu zədə aldı. Bu barədə fikriniz necədi?
- Ümumiyyətlə, zədə alan hər bir futbolçuya görə üzülürəm. Onun öz komandamın, ya rəqibin oyunçusu olmasının fərqi yoxdu. Sadəcə üzüldüyümü bildirir, ona sağlamlıq və gələcək karyerasında uğurlar arzulayıram.

- Sabahkı oyunda hansı komandanı favorit kimi görürsüz?
- Hansı komandanın favorit olacağını demək düzgün olmaz. Hər iki komandanın şansı var.

- Çoxlu ötürmələrlə oynamağı sevirsiz. Sizcə, bu baxımdan, meydanın durumu sizə yardımçı ola biləcək?
- Ümumiyyətlə, futbol ötürmələrlə oynanılır. Hər bir komanda bunu bacarmalıdı və bundan ötrü yaxşı meydan olmalıdı. Burda təkcə meydan deyil, stadiondakı ab-hava məni qane etdi. Həqiqətən də belə bir stadionda oynamaq çox xoşdu. Bildiyim qədərilə sabah stadion azarkeşlərlə dolu olacaq, azarkeşlər hər iki komandanın oyunundan zövq alacaqlar. Düzgün və baxımlı oyun sərgiləməyə çalışacağıq.

- Son illər qalib ayrıldığınız pley-off oyunlarından nələri öyrənmisiz?
- Bunları bir-bir sadalaya bilmərəm. Amma dəfələrlə fikirlərimi bildirmişəm ki, təkcə pley-off deyil, digər qarşılaşmalardan da çox böyük təcrübə toplamışam. Bundan daha artığını etmək və belə görüşlərdə daha çox iştirak etmək istəyirəm ki, bilik, elm və savadım daha da çoxalsın.