Latviyanın paytaxtı Riqada keçirilən Avropa çempionatında uğurlu çıxış edən yeniyetmələrdən ibarət cüdo millimiz vətənə qayıdıb.

“Football-plus.az” saytının məlumatına görə, Heydər Əliyev Beynəlxalq Hava Limanında onları Azərbaycan Cüdo Federasiyasının əməkdaşları, idman ictimaiyyətinin nümayəndələri və yaxınları qarşılayıblar.

Qeyd edək ki, cüdoçuların qazancı 3 qızıl, 1 gümüş və 2 bürünc medal olub. Xəyal Həsənov (50 kq), İslam Rəhimov (55 kq) və Aydan Vəliyeva (48 kq) bütün rəqiblərinə qalib gəlib. Yalnız həlledici final görüşdə uduzan Aydın Rzayev (60 kq) ikinci yeri tutubsa, Babarəhim Mirzəyevlə (50 kq) Zahir Ağazadə (60 kq) bürünc medalla kifayətlənib.

Millimiz komanda hesabında Rusiyadan sonra 2-ci yeri tutub. 37 ölkə təmsilçilərinin mübarizə apardığı qitə birinciliyinə 14 (10 oğlan, 4 qız) çüdoçumuz qatılmışdı.