Əfran İsmayılov niyə ali təhsil almaq fikrinə düşüb? - MÜSAHİBƏ
Əfran İsmayılov bu günlərdə Azərbaycan Dövlət Bədən Tərbiyəsi və İdman Akademiyasına qəbul olmaq üçün qabiliyyət imtahanı verib.
“Səbail”in futbolçusu 32 yaşında tələbə adını qazanmağı bacarıb. Bu fikrin necə yaranması, planları haqda danışmaq üçün təcrübəli yarımmüdafiəçi ilə danışdıq.
- Öncə tələbə olman münasibətilə səni təbrik edirik. Maraqlıdı, birdən-birə ali təhsil almaq ideyası necə yarandı?Çox sağ olun, təşəkkür edirəm. Açığı, bu fikir məndə çoxdan var idi. Sadəcə, fəal futbol oynadığım üçün vaxt olmurdu. Ya qabiliyyətə, ya da dövlət imtahanına çata bilmirdim. İndi isə vaxtım var idi. Həm də fikirləşdim ki, diplomum olsun. Buna görə də gedib imtahan verdim və ilk mərhələdə lazımi balı yığmağı bacardım.
- Heç düşündün ki, təhsil aldığın dövrdən uzun müddət keçib və bu, imthanda çətinlik yarada bilər?Xeyr. Əvvəlcədən imtahanlara hazırlaşırdım. Məktəb vaxtı da bu fənləri yaxşı oxumuşam. Məşğələlərdə olurdum və yaxşı da bal toplayırdım.
Sonra elə oldu ki, futbola başladım. Ya ali təhsil almalıydım, ya da futbolu seçməliydim. Mən də futbolu seçdim və ali təhsil almaqdan uzaqlaşdım. Uzun müddətdi ki, istəyirdim. Bu il nail oldum. Yenidən məşğələlərə getdim və bal topladım. Bəzi suallar da məktəbdə təhsil aldığım vaxtdan bildiklərim idi və yadımda qalmışdı.
- Karyeranı bitirdikdən baş məşqçi çalışmaq istədiyinə görə təhsil almağa qərar verdin?
- Tək baş məşqçi kimi yox, məsələn, nazirliklərdə və ya digər sahələlərdə çalışmaq üçün də lazım idi. Buna görə çalışırdım ki, diplomum olsun. Amma nə qədər çalışam da, məşqlərdən, oyunlardan və başqa səhəblərdən imkan edə bilmirdim. Düşündüm ki, indi vaxtım var və bunu dəyərləndirmək lazımdı.
SƏNƏM FƏRHADOVA
