“İmarət Tayfa”nın stadiona buraxılmamasının səbəbi bəlli oldu
Şənbə günü ölkə çempionatı start götürdü.
Özü də azarkeşlərin iştirakı ilə. Azarkeşlər 2020-nin martından bəri ilk dəfə stadiona buraxılmışdı.
Onlar iyulda, yəni avrokubok oyunlarında tribunalarda yerlərini aldılar. Hamını isə bir sual düşündürürdü: premyer-liqa görüşlərinə azarkeş buraxılacaqmı? PFL prezidenti Ramin Musayev də çempionatın püşkatmasında bu haqda danışmışdı. O, stadionun tutumunun müəyyən həcmində azarkeş buraxılması üçün Operativ Qərargaha müraciət olunacağını söyləmişdi. İlk turdan əvvəl tribunaların 50 faizinə qədər tamaşaçının buraxılacağı deyildi. Lakin bazar günü keçirilən “Zirə” – “Qarabağ” oyununda anlaşılmazlıq baş verdi. Belə ki, ağdamlıların azarkeş qrupu “İmarət Tayfa” tribunaya buraxılmadı.
Stadionda nə baş verdiyini öyrənmək üçün fanklubun idarə heyətinin üzvü Elnur Quliyevlə danışdıq:
“Oyunda özüm yox idim. Lakin durumu “İmarət Tayfa”nın gənc üzvlərindən öyrənmişəm. Onlar oyuna gediblər. Koronavirus pandemiyası ilə bağlı stadiona 50 faiz izləyici buraxılır. Amma əslində rəsmən 50 yox, 30 faizdi. Bunu sonradan üzvlərimiz bəzi adamlardan öyrəniblər. “Qarabağ Ordu”nun üzvləri əvvəlcədən 30 nəfərlik heyətlə yerləşdiyindən “İmarət” stadiona girə bilmədi. Çünki artıq 30 nəfərlik yer dolmuşdu və kiməsə zəng vurub kömək istəmək də mənasız idi. Onların əlində olan bir şey deyildi. Stadiona pandemiyaya görə polis buraxmırdı”.
İSMAYIL XEYRULLAYEV
