Avropa çempionatının final mərhələsində iştirak edəcək qadın voleybolçulardan ibarət milli komanda hazırlığı başa vurub.

“Football-plus.az” saytının məlumatına görə, yığma iki ay davam edən hazırlıq mərhələsində Mingəçevir və Bakıdan sonra Yunanıstan, Macarıstan, Bosniya və Hersoqovinada təlim-məşq toplanışı və yoxlama oyunları keçirib.

Vüqar Əliyevin rəhbərlik etdiyi komanda Bosniya və Hersoqovinadakı məşqlərdə tam heyətlə iştirak edib. Bir müddət əvvəl əməliyyat olunan Alyona Xarçenko da son toplanışda komanda ilə məşqlərə qatılıb. Bəzi təcrübəli voleybolçular isə Avropa çempionatında komandaya kömək edə bilməyəcəklər. Buna səbəb onların zədələri və bərpa mərhələsinin başa çatmamasıdı.

Pandemiya səbəbindən məşqsiz qalan voleybolçular uzun fasilədən sonra iki ay təlim-məşq toplanışlarında və yoxlama oyunlarında əvvəlki formalarını bərpa etməyə çalışıblar. Onlar ciddi həkim nəzarəti altında məşq ediblər. Çünki bəzi voleybolçular hazırlıq prosesində bel və diz zədələri ilə üzləşiblər. Buna baxmayaraq, onlar həkimin müalicə protokolunu və fiziki məşqçinin verdiyi proqramları yerinə yetirərək, tezliklə meydançaya qayıtmaq üçün əllərindən gələni ediblər.

Gənc oyunçuların da cəlb olunduğu komandada 4 voleybolçu ilk dəfə Avropa çempionatında mübarizə aparacaq. Yığma ardıcıl 9-cu dəfə qitə birinciliyində iştirak edəcək.

Avropa çempionatında yığmanın heyətində Ayşən Abduləzimova, Alyona Xarçenko, Kseniya Pavlenko, Yana Doroşenko, Kristina Besman, Şəfaqət Alışanova, Nilufər Ağazadə, Anastasiya Mertsalova, Mariya Kirilyuk, Marqarita Stepanenko, İlhamə Əliyeva, Bəyaz Alıyeva, Yuliya Kərimova, Anastasiya Bayduk çıxış edəcək. Baş məşqçi Vüqar Əliyevə Eldar Yusubov, Emin Əbilov və Sinişa Popek kömək göstərəcək.

Milli komanda bu gün Bosniya və Herseqovinadan birbaşa çempionatın keçiriləcəyi Serbiyanın paytaxtı Belqrada yollanıb.

Qeyd edək ki, A qrupunda yarışacaq milli ilk matçı avqustun 20-də Belçikaya qarşı olacaq. Komandanın oyunları İTV vasitəsilə canlı yayınlanacaq.

20 avqust
19.00. Azərbaycan - Belçika

21 avqust
20.00. Azərbaycan – Bosniya və Hersoqovina
22 avqust
19.00. Rusiya – Azərbaycan
24 avqust
22.00. Azərbaycan - Serbiya
25 avqust
19.00. Fransa – Azərbaycan